Սերժ Սարգսյանը... Արևմուտքն ասաց՝ անձրև է գալիս

Նախօրեին պաշտոնաթող վարչապետը վարչապետի պաշտոնում առաջարկել է այլևս ոչ նախագահ Սերժ Սարգսյանի թեկնածությունը։ Այս իրադարձությունը սպասելի էր, չէ՞ որ վարչապետ՝ նախագահի լիազորություններով, դառնալու համար Սերժ Սարգսյանը սարեր և ձորեր շարժեց, փոխեց Սահմանադրությունը, Հայաստան քարշ տվեց նախագահացու, նախագահացուի համար նստավայր ստեղծագործեց, տվեց նրան պստիկ-մստիկ լիազորություններ, դաշտում իր համար տեղ բաց արեց, ՀՀԿ-ականներին տվեց բոլոր հնարավոր պաշտոնները, իր անունը դարձրեց վարչապետ, և այս ամենն Արևմուտքի քթի տակ՝ արևմտյան կառավարման համակարգի շրջանակներում։

Նա եղավ իր խոսքի տերը, որ այլևս նախագահ չի դառնալու և այդպես էլ արեց՝ իրենով արեց նախագահական կեցավայրը, որը ՀՀ բոլոր նախագահներինն էր, քանի որ այն չէր կարող զիջել մյուս նախագահին, այն «սեփականաշնորհեց»։

Իր նախագահավարչապետական աթոռն ամուր պահելու համար նա պիտան-անպիտան պաշտոններ է բաժանում, աչք է փակում նրանց կոռուպցիայի, փողալվացության, մանր-մունր ժուլիկության, ոչ պրոֆեսիոնալիզմի և այլ թերությունների վրա։

Նա օրենքները դարձրել է եվրոպական, իսկ մտածողությունը պահպանել է ասիական և այս պահին, երբ արևմտյան արժեքներով կարողանում է ասիական բարքերն առաջ տանել, բացի այդ, որևէ արևմտյան երկիր չի կարողանում մատնացույց անել երկրի ոչ ժողովրդավարական թերությունները, ապա ստացվում է, որ նա այն միակ ղեկավարն է, որ կարողանում է և՛ Արևմուտք խաղալ, և՛ Արևելք պահպանել։

Սերժ Սարգսյանը կարող է իր այս ճկունությամբ դասական օրինակ դառնալ աշխարհին, ովքեր ցանկանում են հավիտյանս հավիտենից ղեկավարել երկիրը՝ վարչապետի, նախագահի կամ էլ այլ անվան տակ։

Արտերկրի փորձագետներից մեկը նշել էր, որ Հայաստանի ղեկավարության և ժողովրդի մեջ խզում կա, ասել կուզի՝ ամեն մեկն ապրում է իր կյանքով։ Իշխանությունները չեն փոխվում, ժողովուրդը կա'մ համակերպվում է, կա'մ արտագաղթում․ պայքարում են միայն նրանք, ում ուսերին է մնացել պայքարը։ Հանրությունն արդեն հուսահատ է պատին անարդյունք զարնվելուց, քանի որ եթե Սերժ Սարգսյանը ցանկանա ևս մի քանի անգամ ընտրվել վարչապետ, հետո նախագահ, հետո վարչապետ, ապա ՀՀ Սահմանադրությունը հարմարեցված է Սերժ Սարգսյանի ցանկություններին։ Երևի ավելի ճիշտ կլիներ երկիրը հայտարարել միապետություն՝ և' Արևմուտքին սիրաշահել, և' Արևելքի ջրաղացին ջուր լցնել։

NEWSPRESS.am