Այն, ինչ չի կարելի բոլորին, կարելի է «ախրաննիկ» Վաչեին

Սերժ Սարգսյանի թիկնազորի պետ Վաչե Ղազարյանի կամ Վաչոյի մասին քիչ է գրելը, որ նա մեծ ազդեցություն ունի ոչ միայն թիկնազորային շրջանակներում, առհասարակ հանրային կյանքում:

Բացի այն, որ նրան է վստահված նախագահի պահպանության խնդիրը, նա նաև «կողքից» գումարներ է աշխատում` տարբեր միջոցներով:

Հիշեցնենք՝ թեկուզ տարիներ առաջ Ուսանողական այգում Տերյան փողոցի կողմից կառուցվող հսկայական շինությունը պատկանում էր հենց Սերժ Սարգսյանի թիկնազորի պետ Վաչե Ղազարյանին, գրանցված նրա կնոջ` Ռուզաննա Բեգլարյանի անունով:

Այդ տարածքում և՛ ծառեր հատվեցին, և՛ այգու տեսքն աղճատվեց. այդ բոլորը փող աշխատելու համար, ու եթե Սերժ Սարգսյանն իր թիկնազորի պետին չի կարողանում զսպել, կարո՞ղ է արդյոք զսպել ավելի կարևոր ոլորտներում՝ հատկապես ՀՀԿ նախարարների և բարձրաստիճան պաշտոնյաների ախորժակը:

Նրա անմիջական մասնակցությամբ և՛ ծառեր հատվեցին, և՛ անօրինական շինություն կառուցվեց: Անօրինականություն անում էր հենց նախագահի հասարակ աշխատողը, որի խնդիրը նախագահին պաշտպանելն է, իհարկե, հայտնի չէ, թե ումից, սակայն այդ է նրա գործը: Նա իր երկար ձեռքերն ունի ամենուր և կարող է անգամ անօրինականություն անել. դա նրան կներվի, ինչպես ներվեց:

Բացի այն, որ նա կարող է սրճարաններ կամ այլ հանրային օբյեկտներ ունենալ այնտեղ, որտեղ օրենքով նախատեսված չէ կառուցել և կտրել, նա նաև ուշադիր է տնտեսական դաշտում` ունենալ բիզնես այնտեղ, որտեղ մեծ փողեր են աշխատում. այս անգամ դա ծխախոտի արտադրությունն է:

Այնպես որ՝ եթե Սերժ Սարգսյանը ցանկանում էր կամ է երկրում որևէ բան փոխել, ապա դա պետք է սկսի իր շրջապատից՝ այն մարդկանցից, ովքեր ո՛չ որևէ ուժային կառույց են ղեկավարում, ո՛չ էլ ֆինանսական բուրգ, այլ պարզապես «ախրաննիկ» են: Եթե նրանք կարող են նման անօրինականություններ թույլ տալ, ապա ի՞նչ սպասել, եթե նման ախորժակ ունի որևէ բարձրաստիճան պաշտոնյա, ում ձեռքի տակ կան հսկայական ռեսուրսներ:

Եթե նախագահը ցանկանար որևէ մեկի ձեռքը բռնել, ապա սեփական թիկնազորի պետի ձեռքը կբռներ ու թույլ չէր տա որևէ անօրինականություն անել: Եվ այն, որ թիկնազորի պետն է անօրինականություն անում, դա արդեն հենց երկրի նախագահին պատիվ չի բերում: Ինչպես ասում են, ձուկը հոտում է գլխից: Եթե Վաչե Ղազարյանին կարելի է ծառեր հատել, կարելի է անօրինական օբյեկտ կառուցել, ապա բոլորին էլ կարելի է. բոլորն էլ կարող են և՛ ծառեր հատել, և՛ անօրինական օբյեկտ ունենալ, իսկ ինչո՞ւ ոչ:

Ի դեպ, նա և՛ իր հովանավորյալներն ունի՝ գրեթե բոլոր կառույցներում, ովքեր դարձել են միլիոնատերեր, և՛ սեփականություն` Մարզահամերգային համալիրը, և՛ հանքարդյունաբերական ընկերություն, և՛ կարող է «մարդ բռնելու» սև գործն անել, և՛ էլի բազում ու բազմաթիվ մեղքեր, որոնք դեռևս խնամքով թաքցված են հանրության աչքից, բայց այսպես մինչև ե՞րբ:

NEWSPRESS.am