Վարչապետ Կարեն Կարապետյանը Լֆիկ Սամոյի կողքին է

«Մենք լոյալ դաշտ ենք ստեղծում, որ բիզնեսը զարգանա, բայց մենք մեր սեփական արտադրողին պաշտպանելու խնդիր ունենք»,- երեկ կառավարության նիստի ժամանակ ասել է վարչապետ Կարեն Կարապետյանը` արտոնություն տրամադրելով «Ալեքս տեքստիլ» ՍՊԸ-ին:

Նշենք, որ այս ընկերությունը, որը ՀՀԿ պատգամավոր Սամվել Ալեքսանյանինն է (կամ որ նույնն է՝ Լֆիկ Սամոյինը-հեղ.), ըստ վարչապետի` գտնվում է գերակա ոլորտում և իրականացնում է ներդրումային ծրագրեր. որպես այդպիսին` ընկերության ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերն օգտվելու են ներմուծման մաքսատուրքից ազատվելու արտոնությունից:

Նշենք, որ նման արտոնություններ տրվում են բացառապես կառավարության որոշմամբ, սակայն, ինչպես հայտնի է, տերովին տերն է տարել, անտերին` գելը: Նման արտոնությունից կարող է օգտվել ՀՀԿ-ականի ընկերությունը, սակայն կառավարության կողմից նման մեծահոգության ոչ բոլոր արտադրողներն են արժանանում: Ընդհակառակը՝ եթե թերթենք փոքր ու միջին բիզնեսի էջերը, ապա ամեն տարի այս ոլորտում ընկերություններ են փակվում կամ վաճառվում այլ` ավելի խոշոր ընկերության:

Ի դեպ, ժամանակ առաջ Երևանի ավագանու «Ելք» խմբակցության անդամ Անահիտ Բախշյանն ահազանգել էր, որ Երևանի Մալաթիա-Սեբաստիա վարչական շրջանում, որն ի դեպ, Սամվել Ալեքսանյանի տնօրինության տակ է գտնվում, գազոնների վրա կրպակներ են կառուցվում:

«Ես կանգնած եմ Մալաթիա թաղամասի Րաֆֆու փողոցի գազոնի վրա ու նկարում եմ գազոնի շարունակության վրա մեծ թափով կառուցվող կրպակների շարքը: Այս կրպակների շինթույլտվությունները տրվել են տարեկան 25 հազար դրամով, կառուցվելուց հետո դրանց տերերը վարձով կտան ամսական տասը անգամ ավել գումարով։

Բավական չէ այսպես ավերում են քաղաքը, քաղաքի բյուջե էլ մուտք չեն գործում լուրջ գումարներ, որոնցով կարող են հիմնանորոգել մանկապարտեզների այն շենքերը, որոնք անտերության են մատնված։ Բա սա մայրաքաղաքի կառավարո՞ւմ է, ժողովրդի ասած՝ սա տնաքանդություն է»,- գրել էր Բախշյանը:

Ահա այս «տնաքանդության» հեղինակը Լֆիկ Սամոն է, որին կառավարությունը ներմուծման արտոնություն է տվել, որից ոչ բոլոր գործարարները կարող են օգտվել:
Հիշեցնենք նաև, որ NEWSPRESS.am-ն անդրադարձել էր հենց «Ալեքս տեքստիլ»-ում գործող ստրկատիրական բարքերին, որտեղ աշխատողներն անգամ քիթ սրբելու ժամանակ չունեն, և նրանց հետ վարվում են ինչպես ստրուկների:

Ահա այս խիստ հարգարժան «ստրկատիրոջն» է սատար կանգնել վարչապետը և տվել արտոնություններ, քանի որ ասում են՝ Լֆիկ Սամոյին կինն է պահում, իսկ ինքն իրականում աղքատ է: Իսկ ինչո՞ւ Կարեն Կարապետյանը նման արտոնություն տվեց ՀՀԿ պատգամավորի ընկերությանը. պատասխանը հարցի մեջ է՝ նա ՀՀԿ պատգամավոր է, սատարել է ՀՀԿ-ին բոլոր ընտրություններում` ձայնով, փողով, ռեսուրսներով, աշխատողներով, ընտանիքի անդամներով ազգուտակով, և այսօր, ի նշան շնորհակալության, նրան տրվում է արտոնություն, իսկ նման արտոնության կարիք ՀՀ-ում գործող քանի-քանի մանր ու միջին ընկերություններ ունեն և կանգնած են փակման կամ դժվարությունների առջև, իսկ այստեղ հոպ` եղավ լֆիկություն, ստացավ արտոնություն:

NEWSPRESS.am