Ռուս-թուրքական հարաբերությունները հենված են տնտեսական շահի վրա, ոչ թե աշխարհաքաղաքական. քաղաքագետ

Այսօր լրագրողների հետ հանդիպման ժամանակ քաղաքագետ Հրանտ Մելիք-Շահնազարյանն անդրադարձել է Պուտինի՝ Թուրքիա կատարած այցին և դրա հետևանքներին: Ըստ նրա՝ Ռուսաստանը փորձում է օգտվել Թուրքիա-Արևմուտք-ԱՄՆ սրված հարաբերություններից, սակայն վստահեցրեց, որ ռուս-թուրքական հարաբերությունները հենված են տնտեսական շահի վրա, ոչ թե աշխարհաքաղաքական:

Ինչ վերաբերում է տարածաշրջանում, հատկապես՝ Սիրիայում, Թուրքիայի ակտիվացմանը, քաղաքագետը նշեց, որ Թուրքիան էլ չի թաքցնում իր մոտեցումը Հայաստանի համար կենսական կարևորություն ունեցող մի շարք հարցերի նկատմամբ, հատկապես՝ Արցախի:

«Թուրքիան բացահայտ աջակցում է Ադրբեջանին, այսինքն՝ որևէ միջնորդական կամ հավասարակշռված մոտեցում այնտեղ իսպառ բացակայում է, և Թուրքիան, բացի քաղաքական աջակցությունից, շատ գործուն մասնակցություն է ունենում Ադրբեջանի կայացմանը, սպառազինման աստիճանի մեծացմանը»,- ասաց Հ. Մելիք-Շահնազարյանը:

Թուրքիայից բխող ռիսկերից պաշտպանվելու համար, քաղաքագետը դիտարկում է ՀԱՊԿ-ի և հայ-ռուսական համագործակցությունը, միաժամանակ շեշտում, որ Արևմուտքը, և տարածաշրջանը շահագրգռված չեն տեսնել տարածաշրջանում Թուրքիայի մեծ ազդեցությունը:

«Հայոց ցեղասպանության ճանաչման հարցն ակտիվանում է ամեն անգամ, երբ Թուրքիան ակտիվացնում է իր քաղաքականությունը կա՛մ Եվրոպայի դեմ, կա՛մ մեր տարածաշրջանում»,- ասաց Հրանտ Մելիք-Շահնազարյանը: Նա նաև հավելեց, որ
այս փուլում գործ ունենք ոչ թե հայ-ադրբեջանական հակամարտության, այլ Հարավային Կովկասում Թուրքիայի ակտիվացման հետ և այս թեզը կստիպի միջազգային հանրությանը՝ Թուրքիայի ակտիվությունը զսպելու նոր մեխանիզմներ մշակել: