Ամենաողբերգական ու մղձավանջային օրը Թուրինում․ Ինչո՞ւ «Ռեալը» «սպանեց «Յուվենթուս»-ին

Երեկ Թուրինում տեղի ունեցավ վերջին տարիների ամենամղձավանջային օրը։ «Յուվենթուս» 0-3 «Ռեալ» հանդիպման հաշվին ու գոլերին անդրադառնալու կարիք չկա, քանի որ ոչ պաշտոնապես «Ռեալն» արդեն կիսաեզրափակչում է։ Նույնիսկ «Յուվենթուսի» երկրպագուներն ու ֆուտբոլիստները չեն հավատում, որ կարող են գոնե հիմնական ժամանակում 3 գնդակ խփել ու ոչ մի գնդակ բաց չթողնել, քանի որ սա անփորձ «Տոտենհեմը» չէ։

Հանդիպումից հետո քննադատության ամենամեծ ալիքը բարձրացավ «Յուվենթուսի» գլխավոր մարզիչ Մասիմիլիանո Ալեգրիի հասցեին, ով ընտրել էր շատ տարօրինակ մեկնարկային կազմ։ Հանդիպումից հետո էլ Ալեգրին իր խոսքում փորձում էր հույս հայտնել, որ պատասխան հանդիպման ժամանակ հնարավոր է ինչ-որ բան շտկել, բայց միայն հրաշքով։

Տեսականորեն այս հանդիպման ժամանակ պարտվեցին թուրինյան ակումբի ֆուտբոլիստները, բայց մյուս կողմից մարզչի մեղքն ավելի մեծ էր։ Մասնավորապես «Միլանի» դեմ հանդիպման ժամանակ, որն այնքան կարևոր չէր, որքան «Ռեալի» դեմ հանդիպումը, իտալացի մասնագետը մեկնարկային կազմ էր դուրս բերել թիմի լավագույն ֆուտբոլիստներին, իսկ «Ռեալի» հետ խաղում այլ կազմ էր։ Հստակ երևում էր, որ իտալացի մասնագետը որոշել էր առաջին խաղակեսում 0-0 խաղալ, իսկ երկրորդում խաղադաշտ մտցնել հարձակվողների, ովքեր կփորձեին ճնշել ու արդյունքի հասնել։

Արդյունքում ամեն ինչ այլ եղավ։ Մի՞թե կարելի էր թերագնահատել «Ռեալին» ու մեկնարկային կազմ դուրս բերել թույլ կազմի։ Մի՞թե կարելի էր վարվել այնպես, ինչպես Ալեգրին վարվում է Իտալիայում, երբ խաղում է մրցաշարային աղյուսակի միջնամասում գտնվող թիմերի հետ։

Բայց ստացվում է, որ Ալեգրին թերագնահատել էր «Ռեալին»։ Նա մեկնարկային կազմ էր դուրս բերել եզրային պաշտպան Դե Շիլիոյին, ով նույնիսկ Իտալիայի առաջնությունում իր տեղը չի ապահովել մեկնարկային կազմում, իսկ հանդիպման ժամանակ հստակ երևաց, թե ինչպես այդ եզրը տանուլ տվեց շատ դրվագներ։ Շատերի համար անհասկանալի էր Բենտակուրի ներկայությունը։ Դա նման էր Էմերիի արարքին, ով «Ռեալի» դեմ առաջին հանդիպման ժամանակ Դի Մարիայի ու Դրաքսլերի փոխարեն մեկնարկային կազմ դուրս բերեց անփորձ ֆուտբոլիստ Լո Չելսոյին։ Իսկ եթե թիմի թիկունքում ամեն ինչ վատ է, ապա առջևում ոչինչ չի ստացվի։ Եթե պաշտպանությունը հստակ չէ, անցանելի է, ապա առջևում հստակ բան անել չի կարելի։

Ինչքան էլ Դուգլաս Կոստան լավ դրիբլինգ ունենա, այնուամենայնիվ, նա այս պահին վատ մարզավիճակում է, իսկ պահեստային նստարանին նստած էին շատ հզոր տղաներ։ «Ռեալը» հաղթեց, քանի որ իրեն թերագնահատել էին, իրեն համարել էին շատ հեշտ հաղթահարվող արգելք։ Պատասխան հանդիպման մասին խոսելն անիմաստ է, քանի որ անհնար կլինի այս իրավիճակում հաղթել կամ գոնե ոչ-ոքի խաղալ։ Մի բան հստակ է, որ Ալեգրին պատասխան խաղում մեկնարկային կազմ դուրս կբերի այլ կազմ, բայց իրավիճակը չի փոխվի։

Արդեն հիմա պարզ է, որ «Ռեալը» կիսաեզրափակչում է։

NEWSPRESS.am Sport