Ջրամբարների ոռոգման ջուրը Ջրպետկոմը զոհում է հանուն ՀԷԿ-երի

Ախուրյանի ջրամբարում այս պահին լցվածությունը կազմում է 60 տոկոս, «Արփի լիճ» ջրամբարում լցվածությունը 22 տոկոս է, Ազատի ջրամբարում՝ 56, Մարմարիկի ջրամբարում՝ 33, Ապարանի ջրամբարում՝ 27 տոկոս:

2017-ին Ախուրյանի ջրամբարը գրեթե դատարկվել էր կամ դատարկել էին. պատճառների մասին այդպես էլ չխոսվեց, թեև խնդիր կար, որը կապված է Արարատյան դաշտի ստորգետնյա ավազանի հետ․ ստորգետնյա ջրի հարցը փորձում էին լուծել Ախուրյանի ջրամբարի միջոցով։ Ինչևէ։

Հետաքրքիրն այն է, որ այս ջրամբարն ամենաշատն է լցված, իսկ այս ջրամբարում պետք է որ՝ ջուրն ավելի պակաս լիներ. Թուրքիան սահմանից ոչ հեռու ջրամբարներ է կառուցել և կառուցում, որոնք վերցնում են Արաքս սահմանային գետի ջուրը, և այս գետում ջրային հոսքը նվազել է, իսկ Ախուրյանի ջրամբարը հիմնականում լցվում է հենց Արաքս գետի շնորհիվ։

Պատճառը շատ պարզ է՝ մնացած գրեթե բոլոր ջրամբարներից ներքև կառուցված են ՀԷԿ-եր, որոնք վերցնում են ջրամբարների ջուրը՝ ամառ-ձմեռ, ջուր կա՞, թե՞ չկա, ոռոգման սեզո՞ն է, թե՞ ոչ։

Ժամանակին, երբ փորձ էր արվում ՀԷԿ-երի միջոցով լուծել այլընտրանքային էլէներգետիկայի հարցը, հեռուն չէին տեսնում, որ այդ նույն ՀԷԿ-երը փորձանք են դառնալու հատկապես ջրամբարների և ոռոգման համակարգի գլխին: Այդպես էլ եղավ։ ՀԷԿ-երը ոչ միայն չլուծեցին էներգետիկայի հարցը, բացի ՀԷԿ-երի սեփականատերերին հարստացնելուց, այլև խնդիր չլուծեցին: Հակառակը՝ չորացան բոլոր առուներն ու գետակները և բացի ոռոգման խնդրից, մեծ հարված հասավ գետային համակարգին, կենսաբազմազանությանը։

«Արփի լիճ» ջրամբարը, Ազատի ջրամբարը, Ապարանի ջրամբարը միշտ էլ օգտագործվել են որպես հիդրոէներգետիկայի աղբյուր, և այդ է պատճառը, որ այս ջրամբարներում ջուրը միշտ պակաս է լինում, իսկ ոլորտի պատասխանատուներն իրենց իսկ ոլորտի խնդիրների մասին բարձրաձայնելու փոխարեն մատնացույց են անում բնությունը։

Մի տարի՝ անձրև չեկավ ձյան վրա, հալոցք չեղավ, ջրամբարները չլցվեցին, այս տարի անձրևներ են դիտվել, որն էլ ազդել է ջրակուտակումների վրա, և արդյունքում ջրամբարները չեն լցվել: Ոչ մի խոսք ՀԷԿ-երի մասին, որոնք ձմռանն աշխատում են ջրամբարների ջրով։

Նման քաղաքականության արդյունքում արդեն քանի տարի է՝ Հայաստանում ոռոգման ջրի սուր պահանջ կա, սակայն Ջրպետկոմ-ը խնդիրը որևէ կերպ չի ընդունում. հակառակ դեպքում՝ ստիպված կլիներ ողջ կազմով հրաժարական տալ՝ իրականությունը ծածկելու և ոռոգման ջրի մասին հեքիաթներ հորինելու համար։

NEWSPRESS.am