Գայլերի անունն է դուրս եկել, դաշնակցականներն աշխարհն են քանդում

Երևանի կանաչ տարածքներն անկախությունից հետո սկսեցին կրճատվել․ կա՛մ կանաչ տարածքները վաճառվում էին կոպեկներով, կա՛մ կանաչ տարածքը կտրվում էր՝ որևէ «օբյեկտ» էր կառուցվում։ Մեր իմացած ու չիմացած բոլոր մեծահարուստներից և օլիգարխներից այն կողմ դաշնակցականներն էին՝ իրենց ունեցվածքով, սեփականություններով, նաև կանաչ տարածքի կրճատման իրենց «բաժնով»։

Դաշնակցական Միքայել Մանուկյանին և Հրանտ Մարգարյանին է պատկանում Օպերայի տարածքում գործող հայտնի «Մեղեդի» սրճարանը․ ի դեպ, Օպերայի տարածքը սկսեցին «շրջափակել» դեռևս ՀՀՇ-ի ժամանակներից՝ անգամ այն ժամանակ, երբ ՀՀՇ-ի և ՀՀԴ-ի ջուրը մեկ առվով չէր հոսում։

Ի դեպ, Օպերայի տարածքում դեռևս հնուց համագոյակցել են ՀՀՇ-ն, «Դաշնակցությունը», «Օրինաց Երկիրը», նաև ՀՀԿ-ն, ըստ այդմ, Դաշնակցությանը պատկանում է «Մեղեդի» սրճարանը, «Օրինաց երկիր»-ին` Բելաջոյի Գրիշին՝ «Մագնոլիան», ՀՀՇ-ն ու ՀՀԿ-ն ևս իրենց բաժինն ունեն։

Կարճ ասած՝ ազգի նվիրյալներ դաշնակցականները հանգիստ զավթել են Երևանի կանաչ տարածքները՝ փող են աշխատել, իսկ անունը մնացել է հանուն հայ ազգի զարգացման, բարգավաճման, անվտանգության և էլի այսպիսի հայրենասիրական բաներ։

Մի խելոք մարդ ասում էր. ««Առաջ» պոռալով, ետ-ետ կերթանք»: Իսկը դաշնակցականների մասին է՝ իրենց գրպաններն են լցնում, անունը դնում են հայրենասիրություն։

Ի դեպ, մի քանի տող «Մեղեդի» սրճարանի համասեփականատիրոջ՝ Միքայել Մանուկյանի ունեցվածքից․ 17 միլիոն դրամ եկամուտ, որից 6.9 միլիոն՝ աշխատավարձ, 5 միլիոն՝ շահաբաժին և 5.5 միլիոնը փոխառությունից: Կնոջ՝ Կարինա Կանդարյանի կարողությունը․ 26 միլիոն 740 հազար դրամ եկամուտ:

ԿԳ դաշնակցական նախարար Լևոն Մկրտչյանը հայտարարագրել է երկու բնակարան, հողամաս, ավտոտնակ, ինչպես նաև մարդատար ավտոմոբիլային տրանսպորտի միջոց՝ LEXUS RX 350 մակնիշի:

Նախարարի ունեցած բաժնետոմսերի արժեքը կազմել է 70 մլն 444 հազ. դրամ, իսկ նրա հանձնած փոխառությունները կազմել են 56 հազ. 326 եվրո, 10 հազ. 505 եվրո և 317 հազ. 762 ռուբլի:

Պաշտոնը ստանձնելու օրվա դրությամբ նախարարի դրամական միջոցները կազմել են 20 հազ. դոլար, 25 հազ. եվրո, 10 մլն դրամ:

ՀՅԴ-ական Աղվան Վարդանյանը հայտարարագրել է բնակարան Երևանում՝ 79 ք.մ մակերեսով, նրա տարեկան եկամուտները գոյացել են ԱԺ-ից ստացած 2 մլն 760 հազար 980 դրամ աշխատավարձից, բացի այդ, ունեցել է 2 մլն դրամ և 5 հազար ԱՄՆ դոլար: Նաև հայտարարագրել է 20-25 մլն դրամ արժողությամբ գեղանկարներ:

Սա ընդամենն այն փոքրիկ հարստությունն է, որ Դաշնակցությունն ի ցույց է դրել, խոսակցություններ են պտտվում այս կուսակցության անդամներին պատկանող շինությունների, օբյեկտների, շենքերի, զվարճանքի կենտրոնների, գործարանների վերաբերյալ։

NEWSPRESS.am