Երկրպագուները հավատում են, համակարգը դեռ նույնն է, հավաքականը պարտվում է, իսկ Հենրիխ Մխիթարյանը՝ քննադատվում

Հայաստանի հավաքականը կամաց-կամաց հեռանում է ֆուտբոլից։ Վերջին 2 ընկերական հանդիպումներից հետո մեր հավաքականը ցույց տվեց, որ շատ արագ ու հաստատուն քայլերով դառնում է շատ ցածրակարգ թիմ։ Շատերն սկսեցին քննադատել Հենրիխին, ով ֆուտբոլ չէր խաղում։

Հանուն արդարության պետք է նշել, որ ընկերական հանդիպումների ժամանակ մեր հավաքականի առաջատարն իրեն խնայում էր, քանի որ հանդիպումն ընկերական էր, իսկ առջևում շատ կարևոր հանդիպումներ ուներ «Արսենալի» կազմում։

Պետք է հաշվի առնել այն, որ Մխիթարյանը միայնակ չի կարող ապահովել մի ամբողջ՝ 11 հոգանոց թիմի խաղը։ Թիմը բաղկացած է առաջատարից կամ առաջատարներից, սակայն մեկ առաջատարը չի կարող ապահովել թիմային խաղն ու ոգին։ Մյուս կողմից պետք է հաշվի առնել, որ մեր հավաքականի ֆուտբոլիստները խաղամակարդակով շատ ցածր են։

Այս փաստը ցավալի է, սակայն իրականություն։ Շատերը ցանկանում են, որ վերադառնա Վարդան Մինասյանի, Յուրա Մովսիսյանի ու Ռոբերտ Արզումանյանի հավաքականը։ Շատ հաճախ մամուլի ասուլիսների ժամանակ լրագրողները հավաքականի ներկայիս գլխավոր մարզիչ Արթուր Պետրոսյանին հարցեր են տալիս Յուրա Մովսիսյանից, սակայն մեր հավաքականի մարզիչը լավ էլ գիտի, թե այդ հարցն ում պետք է տալ ու ով է պատասխանատու այդ ամենի համար։

Մեր հավաքականում հիմա չկա Յուրայի մակարդակի հարձակվող։ Յուրան այն մարդն էր, ով գոլ էր խփում, իսկ փաստացի այս պահին մեր հավաքականում չկա ուժեղ գոլահար։ Մյուս կողմից թիմի գլխավոր մարզիչն ասուլիսների ժամանակ նշեց, որ հավաքվել են նոր ֆուտբոլիստներ, ընտրվել է նոր տակտիկա, սակայն այս պահի դրությամբ մեր ընտրանին չի կարողանում հաղթել անգամ շատ թույլ մրցակիցների։

Միգուցե ժամանակները փոխվել են, ու այս պահի դրությամբ Լիտվան ու Էստոնիան ավելի ուժեղ են, քան մեր ֆուտբոլիստները։ Իսկ մյուս կողմից՝ շատերը քննադատում են Հենրիխին ու նշում, որ նա չի կարողանում իր հետևից տանել հավաքականին։ Իսկ երբ հավաքականում կար Յուրան, այն ժամանակ ամեն ինչ լավ էր։ Չէ՞ որ Մխիթարյանը փլեյմեյքեր է, իսկ փլեյմեյքերի համար շատ կարևոր է, որ առջևում լինի ուժեղ գոլահար։

Փաստացի հավաքականի հարցի գլխավերևում կանգնած է Հայաստանի ֆուտբոլի ֆեդերացիայի նախագահը, նրանից մեկ աստիճան ներքև է մարզչական աշխատանքն ու ֆուտբոլիստների խաղը։

Իսկ այս ամենի հետ, մյուս կողմից, հավաքականի երկրպագուներն են։ Մարդիկ, ովքեր հավատարիմ են, հավատում են, սիրում, սպասում ու հաճախում առանց այդ էլ «շատ թանկ» մարզադաշտ։ Մեկ անգամ չէ, որ հավաքականի հանդիպումների տոմսերի գների հարցը քննարկվել է, սակայն փաստացի դեռ փոփոխություն չկա։

Երկրպագուները սպասում են, թիմը չի կարողանում խաղալ, իսկ այս ամենի գլխավոր մեղավորների ցանկում շրջանառվում է աշխարհի լավագույն փլեյմեյքերներից մեկի՝ Հենրիխ Մխիթարյանի անունը։

NEWSPRESS.am Sport