Բոլորի ձեռքերն են արյունոտ. եթե միայն Քոչարյանը սկսի խոսել

Հատուկ քննչական ծառայությունն ընթացք է տվել Մարտի 1-ի իրադարձություններն ուսումնասիրող նախկին փաստահավաք խմբի անդամներ Անդրանիկ Քոչարյանի և Սեդա Սաֆարյանի՝ «Բանակի ներգրավվածությունը Մարտի 1-ի իրադարձություններին» վերնագրված զեկույցին: Այն արդեն կցվել է քրեական գործին, և արդեն այդ ուղղությամբ որոշակի քննչական գործողություններ են ընթանում:

2008-ի մարտի 1-ից անցել է 10 տարի, և այս տարի միայն ՀՔԾ-ն որոշել է ընթացք տալ «Բանակի ներգրավվածությունը Մարտի 1-ի իրադարձություններին» վերնագրված զեկույցին․ խնդիրն այն է, թե ինչո՞ւ։

Մարտի 1-ի օրերին էլ հայտնի էր, որ բանակն է մասնակցել Մարտի մեկին, այնպես չէ, որ դրա համար 10 տարի պահանջվեց և հենց հիմա պարզվեց բանակի մասնակցության հանգամանքը՝ Մարտի մեկի դեպքերին:

Ո՞վ էր շահագրգռված, որ Մարտի մեկ լինի․ Ռոբերտ Քոչարյանը գնում էր և նրա համար հետդարձի ճանապարհ չկար, ապագա 10 տարին Սերժ Սարգսյանինն էր և հենց նա էր շահագրգռված անխափան հասնել ՀՀ նախագահի գահին։

Եթե անգամ Գերագույն գլխավոր հրամանատարը Ռոբերտ Քոչարյանն էր, այնուամենայնիվ, նա միայնակ չէր կարող ողջ հանցանքները կատարել. այն ժամանակ բոլորը միակամ էին՝ ՀՀԿ-ն, ԲՀԿ-ն, «Օրինաց Երկիրը»․ բոլորին ձեռնտու էր, որ երկրում ոչինչ չփոխվի և հանկարծ իշխանափոխություն չլինի։

Այսօր էլ մամուլում շրջանառվում են ներկա և նախկին պաշտոնյաների ցուցակներ, ովքեր այս կամ այն կերպ առնչվում են Մարտի մեկի դեպքերին. մեկը դուռն է բացել, մեկը՝ զինվորներին է հրահանգել, մյուսը՝ մեքենաներով է տեղափոխել․ այսինքն՝ 2008 թվականի մարտի մեկը եղել է համակարգված հարձակում ցուցարարների վրա։

Իսկ Ռոբերտ Քոչարյանի վրա բոլոր մեղքերը կենտրոնացնելը պարզապես նրան որոշակի սահմաններում պահելու փորձ է: Եթե Ռոբերտ Քոչարյանը սկսի խոսել, թե միայն ինքը չէ, որ մասնակից է Մարտի մեկի դեպքերին, որ նույն գործին էին լծված մեծ ու փոքր պաշտոնյաների մի ամբողջ բանակ․ ահա այդ ժամանակ իրավիճակն ավելի հետաքրքիր կլինի։

Թե չէ Քոչարյանի վրա են ցանկանում ամեն ինչ կոտրել, չէ՞ որ նա հենց այնպես այս ամենը կուլ չի տա և այստեղից կսկսի իրական մարտաֆիլմը: 

Իհարկե, վատ չի լինի, որ պաշտպանվելով հարձակվի իր նախկին զինակիցների վրա՝ բացահայտելով Մարտի մեկն առանց ՀՔԾ-ի։ Իսկ ո՞վ կարող է երաշխավորել, որ Քոչարյանը նման մտադրություն չունի և Սերժ Սարգսյանը փորձում է նրանից առաջ անցնել՝ նետելով առաջին քարը։

Սարգսյանն, իհարկե, ցանկանում է առաջին քարը նետել, սակայն հարց է՝ կարո՞ղ է...

NEWSPRESS.am