«Ես չգիտեմ՝ «ոչ»-ի Գյուլչիտայը ով է, բայց ես դա չեմ որոշելու». «Աշոտյանը խնդրում է իրեն չֆետիշացնել»

«Ես չեմ կարող հանձնարարել դպրոցի տնօրեններին, ուսուցիչներին «այո» ասել սահմանադրական փոփոխություններին»: Լրագրողների հետ զրույցում ասաց ԿԳ նախարար Արմեն Աշոտյանը՝ անդրադառնալով ԱԺ-ում «Հայ ազգային կոնգրես» խմբակցության պատգամավոր Լևոն Զուրաբյանի կողմից հնչեցրած հայտարարություններին, թե Աշոտյանը դպրոցներում «զանգվածաբար մարդկանց դրդում է հանցագործություններ կատարել»:

Ըստ նրա Լևոն Զուրաբյանն ունի աղոտ պատկերացումներ կրթական համակարգի մասին, որից ինքը չի զարմանում: ԿԳ նախարարը, նույնիսկ մեծ ցանկության դեպքում, չի կարող հանձնարարականներ տալ, քանի որ չունի  նման լիազորություն:

«Կա անմեղության կանխավարկած, հետևաբար, պետք է ապացույց ներկայացնել, թե ինչում եմ ես մեղավոր: Լևոն Զուրաբյանը չի կարող ապացույցներ ներկայացնել»,- նշեց ԿԳ նախարարը:

Արմեն Աշոտյանն ուրախ է, որ իր «համեստ գործունեությունը ՀԱԿ-ը բարձր է գնահատում: «Պարզապես պետք է խնդրեմ չֆետիշացնել ինձ»,– ասաց նա:
«ՀՀԿ-ն ունի չորս փոխնախագահ, եթե ՀԱԿ-ը սևեռվել է մեկի վրա, չորսով ո՞վ է զբաղվելու»: «Կան «ոչ»-ի տարբեր կենտրոններ, առնվազն չորս կենտրոն ինձ  է հայտնի: Խնդիրը, որը դնում է ՀԱԿ-ի գործընկերը, անհիմն ինձ մեղադրելով, փորձում են ստանալ համապատասխան պատասխան և դառնալ «ոչ»-ի Գյուլչիտայը: Ես չգիտեմ՝ «ոչ»-ի Գյուլչիտայը ով է, բայց ես դա չեմ որոշելու»,- նշեց Աշոտյանը՝ շնորհակալություն հայտնելով ՀԱԿ-ին՝ իր կողմից վարվող «Եռանկյունի» հաղորդումն անվճար գովազդելու համար: