«Մենք չենք ուզում, որ տեսանյութը հրապարակեք»․ Արտաշատի քաղաքապետը հերքում է անհերքելին (տեսանյութ)

Արտաշատի աղբահանության հետքերով NEWSPRESS.am-ին հաջողվել է կապ հաստատել քաղաքապետ Կարեն Բենիամինյանի հետ։

Ավելի վաղ անդրադարձել էինք 33-ամյա քաղաքապետի նախընտրական խոստումներին ու նրա ընտրվելուց հետո քաղաքի բարձիթողի վիճակին։ Կարեն Բենիամինյանի խոստացած մաքուր քաղաքն առայժմ արտաշատցիների համար անկատար երազանք է։

Մեր թղթակիցը եղել է Արտաշատում և նկարահանել աղբով ծածկված տարածքներ ու անդրադարձել քաղաքի խնդիրներին։ Նա փորձել էր հանդիպել նաև քաղաքապետին և հարցի շուրջ ստանալ մեկնաբանություն, սակայն քաղաքապետը տեղում չի եղել։ Իսկ քաղաքապետարանի մամուլի պատասխանատու Գոհար Հովսեփյանն էլ թղթակցին համապատասխան մասնագետի մոտ ուղեկցելու և նրան խնդրի շուրջ մեկնաբանություն տալու փոխարեն, հորդորել է հետ գնալ և գրավոր հարցում ուղարկել։ Սա խոսում է այն մասին, որ կա՛մ Գոհար Հովսեփյանն իր տեղում չէ և չի տիրապետում իր մասնագիտական պարտականություններին, կա՛մ էլ նա պարզապես ցանկացել է, մեղմ ասած, «ցրել» լրագրողին․ երկու դեպքում էլ արդեն վատ է։

«Մենք լրագրողի հետ միշտ էլ զրուցում ենք, շատ բարեհամբյուր ընդունում ենք ու ճանապարհում ենք»,- մեր հարցադրմանն ի պատասխան ասաց քաղաքապետը։

Հարցին, թե ինչո՞ւ հանդիպում չեն կազմակերպել կոմունալ բաժնի պետի հետ, ով և պատասխանատու է աղբահեռացման աշխատանքների համար, քաղաքապետը հարցադրմամբ արձագանքեց․ «Իսկ լրագրողն ո՞վ է․․․ (նկատի ունի նյութի հեղինակին-հեղ․)․․․ ես կուզենամ, որ ճիշտ լուսաբանվի։ Հնարավոր է մի բնակիչ մի պահ բերել մի տեղ մի բան է լցրել․․․»։

Դիտարկմանը, որ ոչ թե մի, այլ 8 աղբարկղեր լցված են եղել աղբով ու տարածքն ամբողջությամբ կեղտով է լցված եղել, քաղաքապետը պատասխանեց, թե իբր ամեն օր իրենք աղբահեռացում են իրականացնում։

«Ես կուզեի, որ դուք գայիք ու միասին շրջեինք, տեսնեիք»,-ասաց նա։

Մեր թղթակիցը արդեն եղել է Ձեզ մոտ և արձանագրել աղբով ծածկված տարածքներ և ունենք նաև տեսանյութ, որը պատրաստվում ենք հրապարակել։

«Մենք չենք ուզում, որ դուք դա հրապարակեք․․․ կարողա՞ մեկը ինչ-որ բան ա ասել, որ վատաբանեք»,-չգիտես ինչու կասկածամտորեն հարցերց քաղաքապետը։

Ինչո՞ւ պետք է շահագրգռված լինենք անտեղի վատաբանել, երբ աղբն իսկապես կա, ու տարածքը մաքուր չէ։

«Ես կուզեի Դուք արդար լինեք։ Ախր Դուք ինձ լավ չեք ճանաչում, ես անձամբ եմ հետևում աղբահանությանը»։

Երևի լավ չեք հետևում, որ մեր տեսախցիկը ֆիքսել է աղբը։

«Ես կուզեի Ձեր լրագրողը գար, համապատասխան պատասխանատուի հետ պտտվեր ամբողջ քաղաքում․․ վաղը ժամը երկուսին սպասում եմ»։

Մեր թղթակիցը արդեն եղել է Ձեր մոտ, ի՞նչ է փոխվելու, հասցնելու եք մաքրե՞լ աղբը։

«Մենք․․ չէ, մենք ամեն օր ենք մաքրում»,-համառորեն պնդում էր քաղաքապետը․ «Ձեր հրապարակումն անհիմն է»,-ասաց նա՝ հաշվի չառնելով այն, որ տեսանյութն ինքնին ավելի քան հիմնավորում է։

Մի խոսքով՝ քաղաքապետը փոխանակ զբաղվի աղբահանումն ավելի հաճախակի դարձնելու, տարածքը մաքրելու (ինչը ևս քաղաքապետարանի գործառույթում է) և ընդհանրապես՝ քաղաքը բարեկարգելու հարցով, փորձում է համոզել, որ մեր աչքերը խաբում են մեզ, և մեր տեսածն այն չէ՝ ինչ մտածում ենք։

Հատուկ նրանց համար, ովքեր կասկածում են, և այն ֆեյսբուքյան ֆեյք օգտատերերի համար, ովքեր անխոհեմ մեկնաբանություններ են թողել հրապարակման տակ՝ պաշտպանելով քաղաքապետին, հրապարակում ենք տեսանյութը, որը թերևս ավելի խոսուն ու համոզիչ է, քան պարզապես նյութի հրապարակումը։

Նկատենք նաև, որ NEWSPRESS.am-ն ունի նմանատիպ էլի տեսանյութեր՝ քաղաքի այլ թաղամասերի խնդիրների հետ կապված։

Արմինե Մկրտումյան