Փաշինյանը «մերկ» է մնում. իշխանությունը զգուշացնում է գալիք խայտառակության մասին

Վարչապետի ընտրություններին հաշված օրեր են մնացել, բայց Նիկոլ Փաշինյանը կարծես թե փորձում է իրավիճակին չհամակերպվել: Անկեղծ լինելով՝ արձանագրենք, որ Փաշինյանն իր այս պայքարում ենթարկվելու է կատարյալ ֆիասկոյի: Իշխանությունը դրա մասին անկեղծորեն զգուշացնում է Փաշինյանին:

Հիմա գանք սկզբից: Երբ 2016 թվականին գրավվեց ՊՊԾ գունդը, Պավլիկ Մանուկյանը լրագրողների հետ զրույցում արեց իր՝ թերևս ամենապատմական արտահայտությունը. «Բոլորը ղախպի տղերք են»: Մանուկյանը չի ասում՝ այսինչ գործչից բացի, ասում է՝ բոլորը…

Գունդը գրավելու օրերին Երևանում դրամատիկ իրադարձություններ էին տեղի ունենում՝ ցույցեր, երթեր, աջակցություն «Սասնա ծռերին» և այլն: Նիկոլ Փաշինյանն այդ օրերին թերևս ամենազգոնն էր՝ ի պատիվ իրեն, Փաշինյանն ասում էր, որ ուժ կիրառել չի կարելի: Փաշինյանի զգոնությունը չներվեց զենքով իշխանությունը վերցնելու ջատագով «Ծռերի» կողմից:

Փաշինյանը բառիս բուն իմաստով հեռացվեց ամբիոնից:

Գալով 2018 թվական՝ մեր օրեր, փաստենք, որ այդ ամենն իշխանությունն օգտագործում է հենց Փաշինյանի դեմ: Մենք այնքան էլ միամիտ չենք, որ հավատանք, թե դատական լսումները հասել էին հենց այն փուլին, երբ պետք էր գաղտնալսումներ հրապարակել:

Բայց «զուգադիպությունը» տեղին էր:

«Սասնա ծռեր»-ի վերջին դատավարության ժամանակ, մեղադրող դատախազը հրապարակեց այդ օրերի գաղտնալսումները, որոնցից մեկի ժամանակ Պավլիկ Մանուկյանն իր կողմնակիցներին հորդորում է՝ Փաշինյանին աղբամանը գցել:

Մանուկյանը դրանից մի քանի օր առաջ էլ բոլորին համարել էր «ղախպի տղա»:

Փաշինյանին դեմ են նաև իր ղեկավարած «Ելք» դաշինքում: Նա դուրս է գալիս պայքարի, որպեսզի Սերժ Սարգսյանը չլինի վարչապետ: Նիկոլ Փաշինյանը հայտարարել է՝ «մերկ ձեռքերի պայքար»:

Չունենալով աջակցություն ո՛չ «Ծռերի» կողմից, ո՛չ անգամ իր համախոհ ընդդիմադիրների կողմից, Փաշինյանը փաստացի մերկ է մնում՝ ոչ միայն ձեռքերով, այլ նաև աջակցությամբ:

Իհարկե, Փաշինյանին զգուշացնողը միայն ու միայն իշխանությունն է: Իշխանությունները Փաշինյանին զգուշացնում են իրենց բոլոր միջոցներով՝ Մարուքյանով, դատախազի հրապարակած գաղտնալսումներով, անգամ ՀՀԿ-ականներով:

Իշխանությունը զգուշացնում է Փաշինյանին խայտառակության մասին:

Վարչապետական ընտրություններին մնացել են հաշված օրեր, և մի քանի օրից հասարակությունը կհասկանա իշխանությունների այս դավադիր ողջ սխեման, որը դեռ լարված է պահում հրապարակի հանդիսատեսին:

Արիանա Հովսեփյան 
NEWSPRESS.am-ի հիմնադիր-տնօրեն