Սերժ Սարգսյանը գրեթե խոստանում է բարձրացնել թոշակներն ու աշխատավարձերը

Արդեն մի քանի տարի է՝ ո՛չ թոշակները, ո՛չ աշխատավարձերը չեն բարձրանում՝ բյուջեում փող չկա, սակայն թե՛ կառավարության, թե՛ Ազգային ժողովի ներկայացուցիչների, էլ չենք ասում՝ նախագահականի ողջ անձնակազմի համար բյուջեում միշտ էլ փող կա։

Թեև Սերժ Սարգսյանը խոստացել էր թե' թոշակների, թե' աշխատավարձերի բարձրացում, սակայն այդ խոստումը մնաց միայն խոստում․ 2018-ին չեն բարձրացել, 2019-ին՝ ևս չի նախատեսվում։

Եվ ահա Կարեն Կարապետյանի վարչապետության շրջանում բարձրացումներ այդպես էլ չգրանցվեցին, իսկ նախօրեին Ազգային ժողովում կառավարության հետ հարցուպատասխանի ժամանակ ՀՀ ֆինանսների նախարար Վարդան Արամյանն անդրադարձել է խնդրին՝ այն «լղոզելով», թե «միջնաժամկետ ծրագրերի ծախսերի մեջ այդպիսի գումարներ չեն նախատեսել, բայց ամեն անգամ քննարկումների ժամանակ խոսել են տնտեսական հնարավորությունների և հարկային եկամուտների աճին ադեկվատ դրանց բարձրացման մասին»:

Այնուհետև հերթական հեքիաթն է պատմել բարձրացումների մասին, սակայն մոռացել է նշել, որ խոստումների ժամանակ բարձրացումներ նշելն այնքան էլ պատշաճ չէ, հատկապես, երբ այդ խոստումները չեն կատարվում։

Ի դեպ, Վարդան Արամյանն ասել է, որ ազգաբնակչությանն առաջին հերթին մտահոգում է թոշակների ու աշխատավարձերի հարցը, և այն «լինելու է մեր օրակարգում: Մենք չենք շրջանցելու այս հարցը․ Առաջիկա 3-4 տարիներին այդ հարցը կլինի կառավարության ուշադրության կենտրոնում»։

Իսկ ինչո՞ւ մի քանի տարի անց․ ակնհայտ է, որ աշխատավարձերի և թոշակների բարձրացումը դրվելու է ապագա վարչապետի ուսերին, որպեսզի նա «լավամարդ» դուրս գա հանրության առջև։ Իսկ ինչ վերաբերում է այն բանին, թե՝ տնտեսական աճը թույլ չի տալիս, պարզապես քաղաքական «մուտիլովկա» է։ Եթե Սերժ Սարգսյանը դառնա վարչապետ, ապա թե՛ տնտեսական աճը, թե՛ թոշակների և աշխատավարձերի բարձրացումը լինելու է նոր վարչապետի օգտին և այսկերպ փորձում են նախապես ապահովել ապագա վարչապետի հեղինակությունը:

«Ումնո». կասեր ռուսը։

Բացի այդ, ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետ Հովհաննես Սահակյանը հայտարարել է, որ առաջիկա երկու տարում թոշակները, նպաստները և նվազագույն աշխատավարձը լրիվ հնարավոր է բարձրացնել։

Այսինքն՝ Սերժ Սարգսյանն ապահովագրել է իրեն խոստումներ տալուց, այժմ նրա փոխարեն նախընտրական խոստումները տալիս են Սերժ Սարգսյանի ենթակաները։

NEWSPRESS.am