Էկոլոգիական միջանցքների շրջանակներում համայնքներին աջակցություն է տրվել

Բնության համաշխարհային հիմնադրամի հայաստանյան մասնաճյուղն «Էկո-մեդիա» լրագրողական ցանցի հետ համատեղ այցելություն էր կազմակերպել Վայոց Ձորի և Սյունիքի մարզեր՝ Հարավային Կովկասում էկոլոգիական միջանցքների ստեղծման աջակցություն ծրագրի շրջանակներում։ Ծրագիրն ընդգրկում է Հարավ-արևելյան Փոքր Կովկասի էկոլոգիական միջանցքը, որը միացնում է Խոսրովի անտառ պետական արգելոցը, Գնիշիկ պահպանվող լանդշաֆտը, Վայոց Ձորի մարզի պետական արգելավայրերը, «Զանգեզուր» պետական արգելավայրը։

Ծրագիրն ուղղված է վայրի կենդանիների միգրացիան պահպանելուն: Այն մեկնարկել է 2015թ. և նախատեսված է իրականացնել 5 տարվա ընթացքում։ Ծրագիրն Արարատի, Սյունիքի և Վայոց Ձորի մարզերի համայնքներին աջակցություն է տրամադրում երկարաժամկետ հողօգտագործման պլանների մշակման և կոնկրետ միջոցառումների իրականացման համար։

Բնության համաշխարհային հիմնադրամի էկոլոգիական միջանցքների ծրագրի ղեկավար Արմեն Շահբազյանը կարևորում է համայնքների միջոցով հենց համայնքների խնդիրների որոշումը և լուծումը․ նման մոտեցումն անհրաժեշտ է, որ համայնքները նաև բնապահպանական հարցերով կարողանան զբաղվել։

«Մենք նպատակ ունենք կովկասյան գորշ արջի, կովկասյան ընձառյուծի, բեզոարյան այծի, հայկական մուֆլոնի պահպանությունն ավելի բարձր մակարդակով իրականացնել և այդ պարագայում ցանկանում ենք, որպեսզի համայնքը նույնպես իր մասնակցությունն ունենա»,- ասում է Արմեն Շահբազյանը։

Նշենք, որ ծրագիրը տրամադրում է աջակցություն՝ անհետաձգելի կարճաժամկետ միջոցառումներ իրականացնելու համար, որոնք կապահովեն միջանցքների էկոլոգիական ամբողջականությունն Արարատի, Վայոց Ձորի և Սյունիքի 26 համայնքում․ ֆոնդը կազմել է 68 000 եվրո։ 2016-թ. ավարտվել է ծրագրի առաջին փուլը։

Երկրորդ փուլը մեկնարկել է 2017թ., այն ընդգրկել է 7 համայնք․ Արևիս, Բռնակոթ, Թասիկ, Սալվարդ, Արտավան, Հորս և Զանգակատուն համայնքները։ Համայնքներում Բնության համաշխարհային հիմնադրամի հայաստանյան մասնաճյուղը համագործակցել է տեղի ՀԿ-ների հետ։

Օրինակ՝ Արտավան համայնքում բարեկարգվել է համայնք մտնող ճանապարհը, ասֆալտապատվել, փոսալցվել է 1600 քմ ճանապարհահատված։ Տրամադրվել է 13 մլն դրամ։

Զանգակատուն համայնքում իրականացվել է ներհամայնքային ճանապարհների արտաքին լուսավորման ցանցի վերականգնում և ստեղծում։ Իրականացվել է 3,5 կմ երկարությամբ ցանցի ստեղծում, 85 հատ էներգախնայող լապտերների և 36 էլեկտրասյուների տեղադրում։

Հորս համայնքում վերանորոգվել է ջրագիծը և անցկացվել լուսավորություն, Արևիս համայնքում վերանորոգվել է գյուղի ջրատարը, Բռնակոթ համայնքում կառուցվել է դպրոցի ճաշարանը, Սալվարդ համայնքում դարձյալ փողոցային լուսավորություն է անցկացվել․ Թասիկ համայնքում ջրագիծ է կառուցվել, նաև ջրահեռացման առու։
Այս ծրագիրը միտված է համայնքների կարիքները լուծելու միջոցով՝ նպաստել համայնքների բնապահպանական գիտակցության բարձրացմանը, կենդանիների անվտանգ տեղաշարժին։

NEWSPRESS.am