«Դաշնակները բառադի, դուրս են եկել պառադի»

NEWSPRESS.am-ի հիմնադիր-տնօրեն Արիանա Հովսեփյանը ֆեյսբուքյան իր էջում գրել է. 

«ՀՅԴ-ն, որ արդեն 3 տարի է՝ մաս է կազմում Սերժ Սարգսյանի և ՀՀԿ-ի իշխանությանը, պատեհ և անպատեհ առիթներով հայտարարում է, որ այս տարվա ապրիլից, Սահմանադրության ուժի մեջ մտնելուց հետո, անցում ենք կատարելու Չորրորդ Հանրապետության:

Այստեղ տեղին է հիշել դերասան և դրամատուրգ Վարդան Պետրոսյանի հայտնի ելույթը՝ «Դաշնակները բառադի, դուրս են եկել պառադի»:

Երրորդ Հանրապետությունը փաստացի սպանվեց 1999 թվականի հոկտեմբերի 27-ին, երբ նախկին դաշնակցական Նաիրի Հունանյանն իր բանդայի հետ գնդակահարեց Վազգեն Սարգսյանին, Կարեն Դեմիրճյանին և Երրորդ Հանրապետության ստեղծման ակնառու ևս 6 գործչի:

Հետո եկավ Քոչարյանի արյունոտ տասնամյակը, որի ժամանակ դաշնակցականներն իրենց զգում էին ինչպես ձուկը ջրում: Չկար Վազգենը, չկար Կարեն Դեմիրճյանը… Չկային խանգարողները…

Դաշնակցականները… Այն դաշնակցականները, որոնք երբեք էլ միանշանակ չեն ընկալվել մեր հասարակության կողմից: Եթե հաշվի առնենք նաև այն, որ դաշնակցականի նախկինը չի լինում, պետք է փաստենք, որ Երրորդ Հանրապետությունը պատմության գիրկն ուղարկելը դաշնակցականների գաղտնի պլանն է:

Այս օրերին էլ արդեն գործող դաշնակցականները՝ Արմեն Ռուստամյանն ու մյուսներն են հայտարարում, որ մենք մտնում ենք մի նոր շրջան, այն է՝ Չորրորդ Հանրապետության դարաշրջան:

Իրենց թվում է, թե արդեն թաղվել է Հայաստանի Երրորդ Հանրապետությունն ու ստեղծվում է Չորրորդ Հանրապետություն:

Երրորդ Հանրապետության մահվան մասին դաշնակցականներն սկսեցին խոսել ավելի հաճախ, ընդ որում՝ Առաջին Հանրապետության 100-ամյակի նախաշեմին:

Խաղը վտանգավոր է այնքանով, որ նախկին դաշնակցականները կրակում են, ներկա դաշնակցականները հայտարարում:

Մեզ մնում է հավատալ միայն մեկ բանի՝ Երրորդ Հանրապետությունը երբեք չի մահանալու: Կեցցե Հայաստանի ազատ ու անկախ Հանրապետությունը: Կեցցե Հայաստանի Երրորդ Հանրապետությունը»: