Ըստ հարցումների՝ 65 հազար հայից 5-ն է իրեն երջանիկ համարում․ սոցիոլոգ (տեսանյութ)

Մարտի 20-ը երջանկության միջազգային օրն է։ Այդ առիթով «Անդրադարձ» մամուլի ակումբը հյուրընկալել էր սոցիոլոգ Ահարոն Ադիբեկյանին և հոգեբան Սամվել Խուդոյանին։

Ահարոն Ադիբեկյանի խոսքով՝ հիմնականում երջանիկ են համարվում են այն երկրները, որտեղ մարդիկ չունեն ջեռուցման, տեղափոխման խնդիրներ։ Ըստ բանախոսների՝ տարբեր երկրներում տարբեր են երջանկության գնահատման չափանիշները։ Օրինակ՝ Արևմուտքում մարդիկ անհատապաշտ են, Հայաստանում մարդիկ երջանիկ են, երբ երջանիկ է նաև նրանց ընտանիքը, հարազատները․ «Հայաստանում երջանկությունը կոլեկտիվ չափորոշիչների համակարգ է»,- ասաց Ահարոն Ադիբեկյանը։ 

Սկանդինավյան երկրներում 3-4 ամուսնությունից մեկն է պահպանվում, Հայաստանում 5-4-ը։ Այս առումով Հայաստանը բավական բարենպաստ դիրքերում է։ 

Ահարոն Ադիբեկյանը ներկայացրեց նաև մեկ տխուր փաստ․ 136-րդ երկրների շարքում Հայաստանը վերջին տեղն է զբաղեցնում այն հարցման արդյունքներով, թե ինչքանո՞վ է Ձեր երեկվա օրը լցված եղել սիրով։ 

Սամվել Խուդոյանն էլ ասաց, որ երջանկությունը որպես երևույթ գոյություն չունի։ 

«Երջանիկ լինելը կապել երկրի տնտեսական վիճակի հետ, աբսուրդ է։ Թուրքիայում օրինակ, շրջաններ կան, որտեղ նման ցածր կենսամակարդակ հնարավոր էլ չէ պատկերացնել, բայց նրանք իրենց երջանիկ են համարում։ Սկանդինավյան երկրներում դեպրեսիան բարձր տոկոս ունի»,- ասաց Խուդոյանը։ 

Ըստ հոգեբանի՝ գիտական տեսակետից աբսուրդ է համարել այս երկիրը մյուսից ավելի երջանիկ։ Երկիրը հարստացնելով էլ հնարավոր չէ մարդկանց երջանիկ դարձնել։ 

Ահարոն Ադիբեկյանն իր հերթին ներկայացրեց վիճակագրություն․ թեստավորում անցած 65 հազար հայից 5-ն է իրեն երջանիկ համարել։ Ահարոն Ադիբեկյանի խոսքով՝ փողով երջանկություն չես գնա, բայց կպահպանես։ 

Եզրափակելով իր խոսքը՝ սոցիոլոգն ասաց, որ, այնուամենայնիվ, հայերը տխուր ազգ են, դա պայմանավորված է երաժշտությամբ, մեր օրորոցայիններից սկսած։