Փարիզում կարող է ակտիվանալ լրտեսությունը

Փարիզյան ահաբեկչություններն, ամենայն հավանականությամբ, կարճաժամկետ հեռանկարում հարված կհասցնեն զբոսաշրջության ոլորտին ու սպառողական ծախսերի մակարդակին, սակայն մի շարք այլ հավանական հետեւանքներ էլ կան, որոնց հետ կարող են բախվել Ֆրանսիան ու եվրոպական մյուս երկրները, գրում է Fortune ամսագիրը:Նախ, երկրում կարող է ուժեղանալ լրտեսությունը, համարում է պարբերականը: Հանուն իրենց անվտանգության՝ մտահոգ քաղաքացիներն ավելի հաճախ են պատրաստ հրաժարվել անձնական տեղեկությունները քողարկելուց: Բայց սա ամենեւին էլ չի նշանակում, որ լրտեսման ուժեղացումը կօգնի կանխել ահաբեկչական հարձակումները: Ոչ այդքան վաղուց Ֆրանսիայում ընդունվել էր օրենք, որը լրտեսություն իրականացնելու լայն լիազորություններ է տրամադրում հատուկ ծառայություններին: Նոր օրենքը առաջացնում է այն մարդկանց դժգոհությունը, որոնք համարում են, որ անձնական տեղեկությունները պետք է անձեռնմխելի մնան: Հոդվածագրի կարծիքով նոր կանոնների «հակառակորդներից» է նաեւ Apple -ի ղեկավար Թիմ Քուքին, հայտնում է Gazeta-ն:

Երկրորդ՝ Եվրոպան ստիպված է լինելու վերանայել միգրացիոն քաղաքականությունը, քանի որ կատարված ողբերգությունը վկայում է դրա անկատարության մասին: Հայտնում են, որ մի շարք տեղեկությունների համաձայն՝ ահաբեկիչներից մեկը Եվրոպա էր ժամանել փախստականի տեսքով, չնայած այս տեղեկությունը դեռ հաստատված չէ: Բայցեւայնպես մի շարք աջակողմյա քաղաքական գործիչներ, ամենայն հավանականությամբ այս կապակցությամբ կուժեղացնեն իրենց հակամիգրացիոն հռետորաբանությունը ու կոչ կանեն ավելի վճռական գործողություններ ձեռնարկել փախստականների դեմ պայքարում, նշում է հոդվածագիրը:

Երրորդ հավանական հետեւանքն է «ԵՄ կարեւորագույն ձեռքբերումներից մեկի»՝ Շենգենյան գոտու վերացումը: Հոդվածագրի կարծիքով, եթե Եվրոպան վերջ տա բաց սահմանների քաղաքականությանը, դա լուրջ հարված կհասցնի եվրոպացիների «գործնական վստահությանը», նաեւ բացասաբար կանդրադառնա վերսահմանային առեւտրի ու բեռնափոխադրումների բիզնեսի վրա:

Չորրորդ՝ փարիզյան ահաբեկչական գործողությունները կանդրադառնան Գերմանիայի կանցլեր Անգելա Մերկելի քաղաքական կարիերայի վրա, համարում է Fortune սյունակագիրը: Մերկելը համարձակ հայտարարություններ էր անում մեծ քանակությամբ փախստականներ ընդունելու հարցում Գերմանիայի պատրաստակամության վերաբերյալ, բայց դրա հետեւանքով նրա վարկանիշը միայն անկում էր ապրում: Հիմա նրա քննադատներն ավելի մեծ համոզմունքով նրան կհանդիմանեն այն « չափազանցված ինքնավստահության» համար, որով նա արտահայտվում էր մահմեդական միգրանտների մասին: Հոդվածագրի կարծիքով, Մերկելի հեռանալու դեպքում նրա պաշտոնը կարող է զբաղեցնել Ֆինանսների գործող նախարար Վոլֆգանգ Շոյբլեն:

Հինգերորդ՝ ողբերգությունը կարող է մթագնել վիեննական բանակցությունների արդյունքները, որոնց ժամանակ քննարկվում էր Սիրիայում քաղաքական նոր վարչակարգի անցնելու գործընթացը: Սակայն ամսագիրը համարում է, որ հենց Մերձավոր արեւելքի խաղաղությունն է ունակ լուծել ժամանակակից աշխարհի «ամենամեծ աշխարհաքաղաքական վտանգը», նաեւ բարելավել Ռուսաստանի ու Եվրոպայի հարաբերությունները: