ՌԴ ընտրություններ․ մահվան պես հզոր

Նախօրեին Ռուսաստանի Դաշնությունը նախագահ էր ընտրում, ավելի ճիշտ` օրինական կերպով ընտրում էր Վլադիմիր Պուտինին։ Իհարկե, դա ռուսների գործն է` ում կցանկանան, կընտրեն, հետաքրքիրը հայերի մասնակցությունն է ընտրություններին։

NEWSPRESS.am-ի հետ զրույցում ՀՀ-ում բնակվող Ռուսաստանի քաղաքացին ասաց, որ օրերս իրեն զանգահարել են Հայաստանում ՌԴ դեսպանատանից, հիշեցրել նրա «պարտքի» մասին և սպառնացել՝ «Դուք ՌԴ քաղաքացի եք, իսկ այժմ ՌԴ-ում նախագահական ընտրություններ են, պետք է Ձեր պարտքը կատարեք, հետո չասեք, թե ինչու այսպես եղավ-այնպես եղավ»։

Կարճ ասած՝ քաղաքավարի հասկացրել են, որ եթե ընտրության չգնան՝ կզրկեն ՌԴ քաղաքացիությունից, իսկ այնտեղից հայերը զգալի գումարներ են ստանում որպես թոշակ, նպաստ։ Այդ է պատճառը, որ մեկ մարդու նման, ահել-ջահել հասել էին ՌԴ դեսպանատուն՝ ընտրության։

Իսկ Հայաստանում, ինչպես գիտենք, զոռով-զորքով, փողով-կաշառքով, համոզելով են Հայաստանի քաղաքացիների փոքր տոկոսին հասցնում ընտրատեղամասեր։

Թեկնածուները ՀՀ-ում քիչ է մնում սեր խոստովանեն ժողովրդին, համոզում են բոլոր հնարավոր միջոցներով, գերատեսչությունների աշխատակցիներին ուղղակի հիշեցնում են, որ պետք է գնալ ընտրության և վերջ․ քիչ թե շատ ժողովրդավարական է: Մարդիկ, կամ մարդկանց մի մասը, ի վերջո գնում է ընտրության, թեև հիասթափությունը մեծ է։

Ռուսաստանի պարագայում՝ Հայաստանում բնակվող ՌԴ քաղաքացիների ոտքերն ուղղակի վախից թուլացել են, երևի մտքներովն ինչ ասես, անցել է՝ ՌԴ քաղաքացիությունից զրկվելուց, մինչև Ռուսաստանի ավանդական միջոցները։ Այնպես որ՝ մեկ մարդու նման, թողած տուն ու տեղ, հանգստավայր, անգամ քաղաքից բացակայելու դեպքում՝ հասել էին ՌԴ դեսպանատուն, ավելին՝ դեսպանատան մոտ կատարյալ հերթագոյացություն էր։

Իսկ զավեշտն, իհարկե, վախեցած հարսն էր, նա հարսի քողով, հարսի շորով եկել էր ընտրության․ ահա այսպիսին է Ռուսաստանը։ ՌԴ քաղաքացիություն ունենալու վրա դողում են, իսկ ամուսնությունը կսպասի։ ՌԴ-ն կարող է մի քիչ փող տալ, մի քիչ տուն տալ, մի քիչ էլ հող տալ՝ մշակելու, սակայն փոխարենը վերցնում է քո ձայնը՝ եթե անգամ ցանկություն չունես այն տալու։

Համոզված ենք, որ հայությունը միաձայն ընտրել է Պուտինին, հակառակ դեպքում՝ թուլացած ոտքերի պարագայում, չի բացառվում, որ մնացած օրգաններն էլ թուլանան։
Հայաստանում բնակվող ՌԴ քաղաքացիները մոտավորապես հիշեցնում են այն հեքիաթի հերոսին, ով հոգին վաճառել է սատանային՝ փողի դիմաց, և եկել է ժամանակ հոգին հանձնելու, այդպես էլ ՌԴ-ի հայաստանյան քաղաքացիները՝ շարվել էին ՌԴ դեսպանատան մոտ և հերթով ստորագրում էին հոգեվաճառության մուրհակը։

NEWSPRESS.am