Քաղաքապետի հերթական «ավանտյուրան», «օդից փող բռնելու» տենչն ու Լուկաշին թաղամասի խաբված բնակիչները (տեսանյութ)

Երևանի Աջափնյակ վարչական շրջանի Լուկաշին թաղամասի բնակիչներն արդեն 6 տարի պայքարում են իրենց սեփականության իրավունքների համար։

2012 թ. Երևանի քաղաքապետարանն այս թաղամասում աճուրդի է հանել հողատարածքներ, որոնք ձեռք են բերել տեղի բնակիչները։ Դեռ այն ժամանակ բնակիչներին անհանգստացրել է տարածքով անցնող 1000 վոլտ լարման հոսանքի գիծը, սակայն վարչական շրջանի ճարտարապետ Կարապետյանը, բնակիչների խոսքով, ասել է, թե իբր հոսանքի գծերը լարում չունեն։

Իսկ երբ արդեն պարզվել է, որ այնուամենայնիվ դրանք լարում ունեն և գնում են դեպի ոմն Սողոմոնյաններին պատկանող «Ագրոսպասարկում» ընկերության շինություն, բնակիչներն անմիջապես դիմել են քաղաքապետարան։ Նախ նրանց ասել են, թե շինարարություն իրականացնելու ժամանակ դրանք կհանվեն։ Մասնավորապես, Հայկ Նալբանդյանին պատասխանել են, թե խնդիրը կլուծեն սահմանված ժամանակահատվածում։ Սակայն այդպես էլ սայլը տեղից չի շարժվել։ Իսկ երբ նա կրկին դիմել է, քաղաքապետարանից պատասխանել են, թե դա իրենց տիրույթում չէ՝ սեփականատիրոջ հետ պայմանավորվածություն կա, և հարցը պետք է լուծել ՀԷՑ-ի շրջանակում։

Բայց որքան էլ տարօրինակ հնչի, բնակիչները ՀԷՑ-ից ստացել են գրեթե նույն պատասխանը․ պարզվում է՝ հոսանքի գծերի հետ ՀԷՑ-ը ևս կապ չունի։ Արտակարգ իրավիճակների նախարարությունն էլ ընդհանրապես խնդիրը հեռացրել է իրենից՝ մոտավորապես ասելով, թե՝ է՛ն դուք, է՛ն թաղապետարանը, Է՛ն քաղաքապետարանը, է՛ն էլ ՀԷՑ-ը, ինչ ուզում եք՝ արեք։

Ու ստացվում է, որ թաղամասի 15 ընտանիք այսօր հայտնվել է անելանելի վիճակում՝ խաբված լինելով քաղաքապետարանից, քանի որ քաղաքապետ Տարոն Մարգարյանի թեթև ձեռքի շնորհիվ կնիքվել են աճուրդով ձեռք բերված սեփականության փաստաթղթերը։ Իսկ քաղաքապետարանի մասնագետներն էլ տառացիորեն խաբել են բնակիչներին՝ համոզելով գնել տարածքը, որն, ի դեպ, ստեղծվել է ճարտարապետ Քասանյանի նախագծմամբ։

Մի խոսքով՝ քաղաքապետարանն իր ծուղակն է գցել բնակիչներին՝ նրանց վրա վաճառելով անպիտան հողեր, որոնց վրա ո՛չ հնարավոր է շինություն գցել, ո՛չ պարիսպ քաշել ու ոչ էլ ծառ տնկել։ Կարևորն այդ պահին օդից փող «բռնելն» էր, ու հերն էլ անիծած, թե խաբվածների թվիը կավելանա ևս 15 ընտանիքով։

NEWSPRESS.am-ն այցելել է Լուկաշինի թաղամաս և խոսել բնակիչների հետ։

Մանրամասները՝ տեսանյութում․