Երբ պաշտոնը տրվում է զվարճանալու համար․ Ասլանյանի թուլությունն ու սթրեսը (լուսանկար)

Վանաձորի քաղաքապետ Մամիկոն Ասլանյանն այն աստիճան անգործության է մատնվել, որ փորձել է զվարճանալ Ֆեյսբուքում։

Նա ֆեյսբուքյան թեստի օգնությամբ ցանկացել է բացահայտել ինքն իրեն, իսկ ավելի կոնկրետ՝ իր բնատուր տաղանդը։ Թե ինչու է հանկարծ նրա մտքով անցել դիմել թեստի օգնությանը, դժվար է ասել։ Հնարավոր է, որ աշխատանքային «ծանր» օրը քաղաքապետին սթրեսի է ենթարկել, և նա փորձել է հանգստացնել նյարդերն այս տարբերակով։ Իսկ այն, որ նա որոշել է հանրայնացնել իր թուլությունը, դա ևս իր պատճառներն ունի։

Չի բացառվում, որ սթրեսից փոքր-ինչ ազատվել ցանկացող պաշտոնյան, ով խաղի ազդեցության տակ արդեն թուլացրած է եղել նյարդերն ու ջղաձգվածությունը, սադրանքի է ենթարկվել թեստի գայթակղիչ պատասխանից, թե «Բոլոր կանայք ցանկանում են հանդիպել ձեզ հետ»։

Ասում են՝ բոլոր ոչ ինքնահաստատված ու թույլ տղամարդիկ հայտնի մուլտֆիլմի հերոսի նման այդ պահին կարող են թույլ տալ երևակայել իրենց գեղեցիկ, խնամված ու խելացի տղամարդ՝ փթթուն տարիքում․ ինչպես Կառլսոնը կասեր՝ «красивый, умный и в меру упитанный мужчина в самом расцвете сил», ում համար կանայք խելքահան են լինում։

Ինքնահաստատման փուլո՞ւմ է Ասլանյանը, թե՞ ոչ, չենք քննարկում։ Բայց փաստն այն է, որ սադրանքի ենթարկված և պատասխանից գայթակղված քաղաքապետի հաջորդ քայլը եղել է՝ հրապարակել թեստի արդյունքը․ «դե բոլորդ տեսեք, թե ով եմ ես» տրամաբանությամբ։ Թեև իրականում այստեղ տրամաբանություն ընդհանրապես չկա։ Ու մինչ ավելի խելոքները դա հասկացել են ու նրան հորդորել շուտափույթ հանել ֆեյսբուքյան էջից այդ խայտառակությունը, ինչպես ասում են, արդեն բանը բանից անցել էր՝ նկարը փոխանցվել էր «հակառակորդի դաշտ» ու ընկել քննադատությունների հորձանուտը։

Ի դեպ, սա Մամիկոն Ասլանյանի կողմից արված միակ սխալ հրապարակումը չէ, որը դրվելուց հետո հեռացվել է նրա ֆեյսբուքյան էջից․․

Իհարկե, այս ամենը կարելի է նաև դիտարկել սովորական շարքային քաղաքացու ձևաչափում՝ հա, ի՞նչ անենք, մարդ ա, բան ա, ստացվել ա, թեստ ա արել, մատը կպել ա, հրապարակվել ա, աշխարհը չքանդվեց։

Բայց իրականում շարքային քաղաքացուց ղեկավարը պետք է տարբերվի հենց իր բռնած դիրքով ու գործով։ Ու իրականում աշխարհը հենց այդպես է քանդվում, երբ ղեկավարներն իրենց տեղում չեն լինում, երբ պաշտոնները տալիս են մարդկանց, ովքեր այն չեն կարողանում արժանապատվորեն կրել իրենց ուսին, մարդկանց, ովքեր իրենց պաշտոնին լուրջ չեն վերաբերվում և ի վերջո՝ մարդկանց, ովքեր որպես ղեկավար հազար ու մի գործ ունենալով՝ զբաղված են ոչինչով։ Ու ամենացավալին այն է, որ նման անլրջություններ իրենց թույլ են տալիս շատ պաշտոնյաներ։

Այստեղ հարց է առաջանում՝ սրա՞ համար էր պայքարում Ասլանյանը՝ քաղաքապետի ընտրությունների ժամանակ և արդյո՞ք պաշտոնը նրան տրվել է զվարճանալու համար։

NEWSPRESS.am