Բակո Սահակյանին ԱՄՆ-ն ընդունեց, իսկ ՌԴ-ն՝ ոչ

Այս օրերին Արցախի հանրապետության շուրջ high level մակարդակի աժիոտաժ է սկսվել:

Առաջին անգամ Արցախի նախագահը ելույթ է ունեցել ԱՄՆ կոնգրեսում և ընդգծել Միացյալ Նահանգների մեծ դերակատարումը տարածաշրջանում խաղաղության ու կայունության պահպանման, ադրբեջանա-ղարաբաղյան հակամարտության խաղաղ և արդարացի կարգավորման գործում:

Այդ բարձր ամբիոնից Արցախի Նախագահ Բակո Սահակյանն իր ելույթից զատ բազմաթիվ այլ հանդիպումներ է ունեցել, օրինակ, ՀՅԴ Արևելյան Ամերիկայի կենտրոնական կոմիտեի ղեկավար կազմի հետ, Ամերիկայում ՀՀ դեսպանի հետ:

Մի խոսքով՝ հագեցած հանդիպումներով և Արցախյան հակամարտության շուրջ ևս մեկ քայլ անելուց հետո Բակո Սահակյանի՝ դեպի Ամերիկա այցին անդրադարձել է նաև ՌԴ ԱԳՆ խոսնակ Մարիա Զախարովան:

«Մենք հավատարիմ ենք ԼՂ խնդրի կարգավորման մեր բոլոր հանձնառություններին՝ գոյություն ունեցող համաձայնությունների շրջանակում: Ակտիվորեն փորձում ենք սատարել իրականում այս շատ բարդ խնդրի՝ լիարժեք ձևաչափով կարգավորմանը»:

Չնայած այս հապճեպ արված արձագանքին՝ Զախարովան նաև չի ասել, որ Բակո Սահակյանին կընդունի նաև ՌԴ-ն:

Անդրադառնալով հարցադրմանը, թե հնարավոր է արդյոք առաջիկայում Բակո Սահակյանի նմանօրինակ այցը Մոսկվա՝ Զախարովան ասել է, որ նմանօրինակ տեղեկատվության չի տիրապետում:

Սա խոսում է այն մասին, որ Հայաստանի տնտեսական, քաղաքական հիմնական գործընկեր ՌԴ-ն դեռևս պատրաստ չէ ընդունել Արցախի նախագահին և լսել, թե ինչ կասի նա ընդդեմ Ադրբեջանի: Իսկ ահա Ամերիկայի պարագայում հարցն այլ կերպ էր ընկալվել, անգամ այն աստիճան, որ ԱՄՆ մի խումբ կոնգրեսականների և սենատորների պատրաստ եղան ընդունելու պետական պարգևներ՝ Արցախին սատարելու և Արցախ-ԱՄՆ հարաբերությունների զարգացման գործում շոշափելի ներդրում ունենալու համար:

NEWSPRESS.am