Հանքարդյունաբերությունը՝ հայ-ադրբեջանական սահմանին

«Պոլիմետալ Արմենիա» ընկերությունը նախատեսում է 2018-2021 թթ. ժամանակահատվածում իրականացնել երկրաբանահետախուզական աշխատանքներ Լոռու մարզի Ալավերդի և Շնող, Տավուշի մարզի Կողբ և Նոյեմբերյան համայնքների վարչական սահմաններում գտնվող տարածքներում: «Շրջակա միջավայրի վրա ազդեցության գնահատման և փորձաքննության մասին» տեղի կունենա հանրային քննարկում:

Տարածաշրջանում, սակայն, ոչ բոլորն են կողմ, որպեսզի հենց սահմանին հանք շահագործվի, և Change.org կայքում ստորագրահավաք է սկսվել «Պոլիմետալ» ընկերության կողմից հանքարդյունաբերության նպատակով Նոյեմբերյան համայնքում հետազոտական գործունեության իրականացման դեմ:

Կապանում, NEWSPRESS.am-ի հարցումների համաձայն` դժգոհ են «Պոլիմետալ Արմենիա» ընկերությունից: Այնտեղ նշում էին, որ, ի տարբերություն այլ հանքարդյունաբերական ընկերությունների, այստեղ ցածր են վճարում, թեև ընկերությունը բավականին բարձր եկամուտներ ունի։ Մարդիկ աշխատում են 80 հազար դրամով և ստիպված են աշխատում, քանի որ տարածաշրջանում աշխատատեղեր քիչ կան և ստիպված են նման ցածր աշխատավարձով աշխատելու։

Հիմա էլ այս ընկերությունը որոշել է ՀՀ հարավային շրջանից անցում կատարել հայ-ադրբեջանական սահման։

Նշենք, որ «Պոլիմետալն» աշխարհի խոշորագույն առաջնային արծաթ արտադրողներից մեկն է, ներառված է Ռուսաստանում ոսկի արդյունահանող ընկերությունների առաջատար եռյակում: Ռուսաստանում արծաթի խոշորագույն արտադրող և ոսկու արդյունահանող առաջատար Polymetal Plc («Պոլիմետալ») ընկերությունը 2016 թվականին ձեռք է բերել Կապանի լեռնահարստացման կոմբինատը 25 մլն դոլարով:

Բացի այդ, Polymetal International plc ընկերությունը 2015թվականին ձեռք է բերել Կապանից ոչ հեռու տեղակայված Լիճքվազ-Թեյի բազմամետաղային հանքավայրը:

Հավելենք, որ «Պոլիմետալի» բաժնետիրական կապիտալի շուրջ 27%-ի վերջնական շահառուն (LSE, Մոսկվայի բորսայի: POLY, ADR AUCOY) Ալեքսանդր Նեսիսի «ԻՍՏ» խումբն է, ընկերության 13%-ը պատկանում է Պյոտր Կելների չեխական PPF Group NV-ին: Բացի այդ, կանոնադրական կապիտալի շուրջ 1%-ը վերահսկում է ընկերության տնօրենի մենեջմենթը, 19%-ը՝ մասնավոր անձինք և 40%-ը` անհատ ներդրողներ:

Լիճքվազ-Թեյի ոսկու հանքավայրը գտնվում է Սյունիքի մարզում՝ Մեղրի գետի միջին հոսանքի աջ ափում, Վարդանաձոր գյուղից 4կմ դեպի հյուսիս-արևմուտք, Երևան- Մեղրի-Իրան ավտոմայրուղուց 2.5կմ և Մեղրի երկաթգծի կայարանից 20 կմ հեռավորության վրա: Հանքավայրը տեղակայված է Զանգեզուրի լեռնաշղթայի արևելյան հատվածի 1200-1700մ բացարձակ բարձրությունների վրա:

Հիշեցնենք, որ 2017 թվականին դրական եզրակացություն է ստացել «Լիճքվազ» ՓԲԸ-ի Լիճքվազ-Թեյի ոսկու հանքավայրի շահագործման հայտը: Հանքավայրը տեղակայված է «Արևիք» ազգային պարկի տարածքում։ Թեև ազգային պարկի սհամանները դեռևս հստակեցված չեն, այն մեկնարկելու է շուտով և կավարտվի տարեվեջին, սակայն ակնհայտ է, որ այս ընկերությունը Հայաստանից որոշել է ստանալ առավելագույնը՝ էժան աշխատուժ, մեծաքանակ շահույթ։