Սյունիքի մարզում իրականացվում է պահպանվող տարածքներին ուղղված մեկ ծրագիր՝ երկու նպատակով

Սյունիքի մարզում մեկնարկել է «Պահպանվող տարածքների աջակցման ծրագիր-Հայաստան» ծրագիրը, որը Գերմանիայի տնտեսական համագործակցության և զարգացման դաշնային նախարարության կողմից մեկնարկված կովկասյան նախաձեռնության մասն է կազմում։ Ծրագրի բյուջեն 8․25 մլն եվրո է։

Ծրագրի համակարգող Մարտիրոս Նալբանդյանը նշում է, որ ծրագիրը մեկնարկել է 2015 թվականից, ունի 2 բաղադրիչ՝ բնապահպանական և սոցիալ-տնտեսական: Ծրագիրն ավարտվելու է 2020-ին։

Նա նաև նշում է, որ ծրագիրը միտված է Հայաստանի հարավային տարածքներում պահպանվող տարածքների կարողությունների հզորացմանը, նաև աջակցում է բուֆերային գոտում տեղակայված համայնքների սոցիալ-տնտեսական խնդիրների լուծմանը։

«1-1,5 տարում կատարվել է համայնքների կարիքների բացահայտում, որից հետո կազմվել է կոնկրետ գործողությունների մեկնարկը, ներդրումներ են արվել 32 համայնքներում, 30 համայնքում ծրագիրն արդեն ընթացքի մեջ է․ յուրաքանչյուր համայնքի տրվել է 5 հազարական եվրո դրամաշնորհ՝ լուծելու գյուղերի կարիքները: Պահանջները բազմազան են եղել»,- ասում է Մ․ Նալբանդյանը։

Նշենք, որ ծրագրի շրջանակներում, ելնելով համայնքների առաջարկներից, համայնքներում իրականացվել է միջհամայնքային ճանապարհների վերանորոգում, ներհամայնքային խմելու ջրի ցանցի նորոգում, գույքի տրամադրում, գերեզմանատուն, ճանապարհ և ցանկապատի կառուցում կամ նորոգում, համայնքային լուսավորության անցկացում, մանկապարտեզների վերանորոգում կամ գույքի տրամադրում և այլն։

Մարտիրոս Նալբանդյանը նաև շեշտում է, որ հատկապես մեծ է եղել ուշադրությունը Շիկահող պետական արգելոցի տարածքի 4 համայնքի հանդեպ․ արգելոցային գոտում գտնվող համայնքները զրկված են անգամ պետական արգելոցի տարածքից թափուկ հավաքելուց, քանի որ արգելված է և այդ է պատճառը, որ այս չորս համայնքում բնակիչներին տրամադրվել է 9 ք/մ ջերմամեկուսիչ պատուհան, որը 30 տոկոսով կրճատում է վառելափայտի պահանջը։ Բուֆերային գոտու 4 գյուղի 247 տնային տնտեսության տրամադրվել է տեղական արտադրության 1400 մեկուսիչ պատուհան, նաև վառելափայտ։

Բացի սոցիալ-տնտեսական բաղադրիչից, ծրագրի շրջանակներում, ծրագրի համակարգողի փոխանցմամբ, պահպանվող տարածքներին, «Հայանտառ»-ին, Ջրավազանային կառավարման մարմնին և բնապահպանական տեսչությանը տրամադրվել է աջակցություն․ համակարգչային տեխնիկա, վրանային պարագաներ զբոսաշրջության զարգացման համար և այլն։

Բացի այդ, Մ․ Նալբանդյանը շեշտեց, որ շուտով մեկնարկելու են Արևիկ ազգային պայմանների սահմանների ճշգրտման աշխատանքները, որը մինչև տարեվերջ պատրաստ կլինի։

Նշենք, որ ծրագիրն ավարտվելու է 2020 թվականին։