Հայկական գյուղմթերքի արկածները` ռուս-վրացական սահմանին. լոլիկ ու սմբուկ է ոչնչացվել

ՌԴ պետական սահմանի «Վերին Լարս» անցակետում Հայաստանից արտահանված ավելի քան 6 տոննա բանջարեղեն է ոչնչացվել. լոլիկ, սմբուկ և պղպեղ: Այս մասին հայտնում է «Ռոսսելխոզնադզորի» պաշտոնական կայքը:

Պարզվում է, որ բեռն ուղեկցող փաստաթղթեր չի ունեցել, որը պարտադիր է գյուղմթերք արտահանելիս:

Նշենք, որ այս սեզոնին շատ քիչ ջերմոց մշակողներ ունեն այդքան բերք արտահանելու համար, իսկ այն, որ առանց փաստաթղթերի գյուղմթերքով բեռնված մեքենան հասել է մինչև ՌԴ սահման, չի խոսում սահմանային անցակետում գործող բուսասանիտարական ստուգման մասին:

Հավելենք, որ օրերս Օհանավան գյուղի բնակիչներն ի նշան բողոքի փակել էին ճանապարհը, քանի որ նույն «Վերին Լարս» անցակետում հայկական խնձորը չէին թողնում մտնել ՌԴ, քանի որ կասկածում էին, որ բեռնվածը թուրքական պտուղ է, հայկական կողմը վերաարտահանում է:

Ինչ վերաբերում է վերաարտահանմանը, ապա որոշ «ճարպիկներ» գործի համարը հանել են, քանի որ ՌԴ-ն արգելել էր թուրքական գյուղմթերքի արտահանումը ՌԴ, գյուղմթերքը, մասնավորապես՝ լոլիկը, ներկրվում էր Թուրքիայից Հայաստան և վերաարտահանվում և այժմ էլ փոքր թյուրիմացության ժամանակ ռուսներն արդեն կասկածում են, թե այս դեպքում խնձորը հայկական չէ:

Իսկ այժմ էլ հայկական գյուղմթերքը: Այստեղ խնդիրն այն է, որ անհրաժեշտ փաստաթղթերի բացակայությամբ գյուղմթերքը հասել է ՌԴ, անցել հայկական անցակետը, որտեղից օձն իր պորտով, ղուշն իր թևով առանց փաստաթղթի չի անցնում:

Կարելի է մի քանի վարկած դիտարկել. կարողացել են ՀՀ սահմանն անցնել՝ հույս ունենալով, որ ՌԴ սահմանն էլ կանցնեն, փաստաթղթեր պարզապես չեն տվել, կամ էլ ոմանց հերթական անգամ խանգարում է գյուղմթերքի արտահանումը:

Ի դեպ, արտահանման մրցակցություն ևս կա, քանի որ գյուղմթերքի արտահանումից մեծ եկամուտներ են ստանում: Մասնավորապես, դժգոհություներ կան «Սպայկա» ընկերությունից, որը չարաշահելով ոլորտում իր մենաշնորհն ու ռեսուրսները` փորձում է թե՛ միրգ ու բանջարեղեն ձեռք բերելիս գին թելադրել, թե՛ արտահանելիս ռուսական շուկաներում տարածքից զրկել:

Մինչև կպարզվի, թե ի վերջո ո՞վ է մեղավոր, որ հայկական խնձորն արկածներով հասավ ՌԴ, հայկական միրգը ոչնչացվեց ճանապարհին, պարզ է այն, որ ոլորտի պատասխանատուն` ՍԱՊԾ-ն, դեռ շատ աշխատանք ունի ոլորտում անելու: Իհարկե այդ աշխատանքներն ավելի արագ կարվեին, եթե այս կառույցում պաշտոնյաներն ու աշխատակիցները լինեին կոմպետենտ և մասնագետ:

NEWSPRESS.am