Մանկամիտ Կալաբրիան ու Գատուզոյի թիմի խառնաշփոթը․ 3 պատճառ, թե ինչու պարտվեց «Միլանը»

Երեկ Եվրոպալիգայի խաղարկությունում «Արսենալը» հյուրընկալվեց ու 2 անպատասխան գնդակ ուղարկեց «Միլանի» դարպասը։ Հանդիպումից առաջ նույնիսկ Արսեն Վենգերը չէր հավատում, որ կարող է հաջողության հասնել։ Չէին հավատում երկրպագուները, ֆուտբոլիստներն ու գրեթե ամբողջ ֆուտբոլային աշխարհը։ Բայց․․․

Բայց փաստացի միլանյան ակումբը պարտվեց սեփական հարկի տակ։

NEWSPRESS.am Sport-ը ներկայացնում է 3 պատճառ, թե ինչու երեկ պարտվեց իտալական թիմը։

1․ Կալաբրիան նման էր բակային ֆուտբոլ խաղացող պաշտպանի։

Գատուզոյի առաջին ամենամեծ սխալը Կալաբրիայի՝ մեկնարկային կազմում հայտավորվելն էր։ Մանավանդ այն դեպքում, երբ նա այդ եզրում հսկելու էր Մխիթարյանին։ Մխիթարյանն ամբողջ առաջին խաղակեսում չզգաց Կալաբրիայի ներկայությունը։ Գատուզոն լավ գիտեր, որ եզրերում խաղալու է Մխիթարյանը, և այս դեպքում նա մեկնարկային կազմում չհայտավորեց բազմափորձ Աբատեին, ով շատ արագ է, ունի մեծ փորձ, կարողանում է լավ փակել փլեյմեյքերներին ու մասնակցել թիմի գրոհներին։ Այս ամենից իտալացի երիտասարդ պաշտպանը չարեց և ոչ մեկը։ Ու խաղը, թիմի ոգին կոտրվեց հենց Կալաբրիայի սխալների պատճառով։ Փաստացի Մխիթարյանը ճեղքեց Կալաբրիայի եզրի պաշտպանությունը ու գրավեց մրցակցի դարպասը։ Այս հանդիպումից հետո Գատուզոն դասեր կքաղի ու հավանաբար պատասխան խաղին մենք կտեսնենք կա'մ Աբատեին, կա'մ Բորինիին կա'մ էլ ավելի լավ Կալաբրիա։

2․ Գատուզոն զգում էր «Արսենալի» ուժն ու այդ ամենի դեմ քայլեր չէր ձեռնարկել։

Դժվար կլինի ասել, թե Գատուզոն ինչ պլաններ ուներ, բայց փաստացի իտալական ակումբը ոչինչ չկարողացավ անել թե՛ առջևում, և թե՛ պաշտպանությունում։ Թիմի հենակետային գոտին ուղղակի չէր գործում։ Ամենամեծ սխալները թույլ էին տալիս կենտրոնի համար պատասխան տվող ֆուտբոլիստները՝ Կեսսիեն ու Բիլիան, սակայն նրանք սխալներից զատ չէին կարողանում նաև գնդակ խլել։ Փաստացի լոնդոնյան թիմի դեմ խաղում ամենամեծ տանուլ տված օղակներից մեկը հենակետային գոտին էր։ Խաղ քանդող Կեսսիեն չկարողացավ ոչինչ անել, իսկ գրոհներ կազմակերպող ու սկսող Բիլին ոչինչ չէր անում ու նրա փոխարեն այդ պարտականությունն իր վրա վերցրեց Լեոնարդո Բոնուչին։ Գատուզոն գիտեր, որ «Արսենալի» ամենաթույլ օղակը պաշտպանությունն է, սակայն թիմը չկարողացավ ոչինչ անել։ Լոնդոնցիների թույլ պաշտպանությունը կարողացավ լավագույնս դիմակայել։ Հանդիպման սկզբում, երբ Ռոսոներիների մոտ գրոհների տարափ էր, այդ ժամանակ լոնդոնցիները սխալվում էին, ու հստակ երևում էր, որ մեծ ճնշման դեպքում այդ սխալները կշատանան։ Սակայն Մխիթարյանը կոտրեց Գատուզոյի սաների ոգին։

3․ «Միլանը» նման չէր թիմի, ու չկար սուր ու թիմային խաղ։

Հանդիպումից հետո թիմի ավագ Բոնուչին ասաց, որ իրենք նման չէին թիմի։ Այդ մասին խոսեց նաև Գատուզոն։ «Միլանը» չէր հասկանում, թե ինչ պետք է անի ու ինչ կարող է անել։ Թիմի կազմում հիմնականում երիտասարդ ֆուտբոլիստներ էին, ովքեր առաջին անգամ էին հանդես գալիս եվրոպական ուժեղ ակումբի հետ։ Միգուցե նաև փորձի պակասն էր, որ Կալաբրիան, Կեսսիեն, Կուտրոնեն չկարողացան ոչինչ անել։ Հստակ երևում էր, որ հանդիպման սկզբում թիմը սկսեց խաղալ այնպես, ինչպես խաղում էր Իտալիայի առաջնությունում, սակայն հետո հասկացավ, որ իրենց դիմաց եվրոպական թոփ ակումբներից մեկն է։ Պատասխան խաղում ամեն ինչ բարդ է լինելու։ Իտալական թիմը պետք է ցուցադրի ֆանտաստիկ խաղ։ Դժվար է գուշակել, սակայն իտալական թիմը կխաղա հարձակվողական ֆուտբոլ ու կփորձի շատ արագ 2 գնդակ հետ բերել։ Հանուն արդարության պետք է նշել, որ Եվրոպալիգայի այս խաղարկության ժամանակ իտալական թիմն ավելի լավ է հանդես գալիս մրցակցի հարկի տակ։ Միգուցե «Միլանը» խաղա այնպես, ինչպես դա արեց «Յուվենթուսը»։

Լոնդոնում սպասվում է թեժ հանդիպում։