Դիմակայություն, որի ելքը վճռվեց 3 րոպեում

Երեկ Չեմպիոնների լիգայի խաղարկության 1/8-րդ եզրափակչի պատասխան հանդիպումները կայացան։ Օրվա կարևորագույն հանդիպումը կայացավ Լոնդոնում, որտեղ «Յուվենթուսը» հաղթեց «Տոտենհեմին»։

Վստահաբար կարելի է նշել, որ կայացավ Չեմպիոնների լիգայի այս խաղարկության լավագույն հանդիպումներից մեկը։ Ֆուտբոլային վերլուծաբանները տարբեր կարծիքներ էին հայտնում այս հանդիպման հետ կապված։ Փաստացի պետք է նշել, որ դիմակայում էին երկու ակումբներ, որոնցից մեկն ուներ հսկայական փորձ, իսկ մյուսը՝ երիտասարդ, եռացող արյուն ունեցող ու նպատակների համար կյանք տվող ֆուտբոլիստներ։ Առաջին խաղակեսում «Տոտենհեմը» ցույց տվեց, որ իրականում փորձը կապ չունի ու այստեղ մեծ դեր կարող է խաղալ երիտասարդական ակումբի ուժն ու նպատակասլացությունը։

Սակայն երկրորդ խաղակեսում իտալական ակումբը կարողացավ իր փորձի հաշվին վճռել դիմակայության ելքը։ Հանդիպման ժամանակ ֆանտաստիկ գործեց «Յուվենթուսի» պաշտպանությունը։ Կիելինին, Սանդրոն ու Բենատիան ցույց տվեցին, թե ինչպես կարելի է գնդակն առանց խախտումների հանել Քեյնի, Ալիի ոտքերի տակից։

Իսկ փաստացի այս դիմակայության ելքը վճռվեց 3 րոպեում։ Իտալական ակումբն իր պատմական փորձն ու գաղափարը ներդրեց այդ 3 րոպեների մեջ։ Պետք է նշել նաև, որ թուրինցիները հաղթեցին, քանի որ աշխատում էր հրաշալի պաշտպանությունը։ Այս հանդիպումից շահեցին իտալական թիմի երկրպագուներն ու ֆուտբոլային երկրպագուները։

«Յուվենթուսն» այս հանդիպումից հետո ավելի մեծացրեց իր շանսերը, և պետք է նշել, որ թիմը համարվում է գլխավոր ֆավորիտներից մեկը։