Պատճառներ, թե ինչու այսօր «ՊՍԺ»-ն առանց Նեյմարի կխաղա ավելի լավ ֆուտբոլ

Արդեն այսօր Չեմպիոնների լիգայի խաղարկությունում տեղի կունենան 1/8-րդ եզրափակչի պատասխան հանդիպումները։ Օրվա գլխավոր դիմակայությունը տեղի կունենա Փարիզում, որտեղ «ՊՍԺ»-ն կմրցի «Մադրիդի Ռեալի» հետ։ Ֆրանսիական ակումբը մեծ կորստով է մոտենում այս հանդիպմանը, քանի որ վնասվածք ունի Նեյմարը, ով հանդիսանում է ֆրանսիական թիմի գլխավոր ֆիգուրներից մեկը։

Ֆրանսիական թիմի ղեկավարությունն ու մարզչական շտաբը նշում են, որ Նեյմարի բացակայությունը ցավալի կլինի թիմի համար, սակայն իրականում շատ վերլուծաբաններ նշում են այլ կարծիքներ։

NEWSPRESS.am Sport-ը ներկայացնում է պատճառներ, համաձայն որոնց՝ այսօր «ՊՍԺ»-ն ավելի լավ կխաղա առանց Նեյմարի։

Նեյմարը ֆրանսիական թիմում լավագույններից է ու այդ տիտղոսի համար պայքարում նա կարող է զիջել միայն Կավանիին։ Սակայն թիմը թիմ է առաջին հերթին 11 ֆուտբոլիստով։ Այստեղ շատերը կհիշեցնեն մասնագետների այն խոսքերը, որ առանց Մեսսիի «Բարսելոնան» թույլ է։ Այդ ամենի մեջ կա իրականություն, սակայն պետք է հաշվի առնել, որ արգենտինացին միակն է, ով այլմոլորակային է։

Նեյմարը կատալոնական թիմում հանդես էր գալիս լավ, քանի որ այնտեղ կային բարձրակարգ ֆուտբոլիստներ ու կար թիմ։ Կար թիմային ոգի ու կար Մեսսի։ Նույնիսկ Մեսսին չի խաղում եսակենտրոն ֆուտբոլ, ինչ մնաց, թե այդ աներ Նեյմարը։ Հանուն արդարության պետք է նշել, որ փարիզյան թիմում չկա բնավորություն։ Դա լավագույն կերպով երևաց նախորդ տարի Չեմպիոնների լիգայի խաղարկության ժամանակ «Բարսելոնայի» դեմ խաղից հետո։ Իսկ բնավորության համար պետք է ժամանակ, մարզիչ, նվիրված ֆուտբոլիստներ, գումարներն անտեսող մարդիկ։ Այս ամենի համատեքստում պետք է նշել, որ Պեպ Գվարդիոլան կարողացավ ստեղծել այդպիսի «Մանչեսթեր Սիթի»։

Որքան էլ Նեյմարը շրջանցի Ֆրանսիայի առաջնության թիմերի բոլոր պաշտպաններին, գրավի մրցակից դարպասները 3-5 անգամ ու ցույց տա անհավանական ֆուտբոլ, միևնույն է՝ Ֆրանսիայի առաջնությունը չի դառնա «Մադրիդի Ռեալ» կամ այլ թիմ։

Մյուս կողմից՝ պետք է տեսնել, որ մադրիդցիների հետ հանդիպման ժամանակ Նեյմարը չկարողացավ ոչինչ անել։ Նա նույնիսկ չկարողացավ գնդակը փոխանցել Կավանիին, ով կարող է ոչնչից ստեղծել գոլեր, քանի որ Նեյմարն իսպանական ակումբի պաշտպաններին շփոթել էր Ֆրանսիայի առաջնության պաշտպանների հետ։ Այլ կերպ ասած՝ եսակենտրոն ֆուտբոլում Նեյմարը չկարողացավ ոչինչ անել «Ռեալի» դեմ խաղում։

Այս ամենն արդեն իսկ վկայում է, որ ֆրանսիական թիմն այսօր կայանալիք խաղում կխաղա թիմային ֆուտբոլ։ Որքան էլ փարիզյան թիմը հեռու է թիմային հզոր ոգուց, այնուամենայնիվ, նրանք կփորձեն թիմային խաղ ստեղծել՝ մոռանալով եսակենտրոն Նեյմարին։