Տղե՛րք, ձե՞ռք եք առնում, ո՞ւմ վրա եք ծիծաղում

Որքան ընդդիմությունը թմբկահարում, զուռնա-դհոլ առած՝ «տուշ է տալիս» ու «շախի գցում»՝ ցույց տալու համար, թե ինքն է ամենաիրական ընդդիմությունը, այնքան ինքն իրեն բացահայտում է հակառակ դաշտում։

Անդրադառնանք Ազգային ժողովում տեղի ունեցած վերջին 2 դեպքին՝ Բարձրագույն դատական խորհրդի և ՀՀ նախագահի ընտրություններին։

Նախ պարզվեց, որ «Ելք» խմբակցությունից 5 պատգամավոր քվեարկել ո՛չ թե Գագիկ Հարությունյանի դեմ, այլ կողմ։ Թեև իրենք՝ ելքականները պնդում էին, որ թերթիկները փոխվել են ՀՀԿ-ականների կողմից։

NEWSPRESS.am-ն արդեն այս առիթով ներկայացրել է վարկած, ըստ որի` տեղի է ունեցել գործարք՝ ՀՀԿ-«Ելք» ձևաչափում։ Իսկ «Ելք»-ի աղաղակների նպատակը պարզապես իր ընդդիմադիր դիրքը պահելն էր։

Հաջորդ անգամ, արդեն ՀՀ նախագահի ընտրությունների ժամանակ, «Ելք»-ն ավելի զգուշավոր էր։ Մասնավորապես՝ Նիկոլ Փաշինյանը նկարել էր իր քվեարկությունը՝ ոչ- Արմեն Սարգսյանին։

Այստեղ զավեշտալին այն էր, որ ընդդիմության 7 պատգամավորից բացի, նախագահի թեկնածու Արմեն Սարգսյանին դեմ էր քվեարկել ևս 3 պատգամավոր։ Այս առթիվ Փաշինյանը փորձեց կատակել, թե՝ միայն «Ելք»-ում չկան ծպտյալ հանրապետականներ, այլ ՀՀԿ-ում կան ծպտյալ ելքականներ։ Նրա այս արտահայտությունն ընդունվեց որպես հումոր. ծիծաղեցին, անցավ, գնաց։

Ցավը, սակայն, այն է, որ Փաշինյանն իրավացի է և այս արտահայտությամբ, փաստորեն, նա ոչ թե ցրեց կասկածները, այլ ամրապնդեց վարկածը, որ տեղի է ունեցել «Ելք»-ՀՀԿ գործարք։ «Ելք»-ի սխալը ծածկելու համար, այժմ էլ թերևս որոշվել է՝ ՀՀԿ-ական պատգամավորներից մի քանիսը դեմ քվեարկեն։ Դրանից Արմեն Սարգսյանի նախագահությունը չի տուժի, բայց կասկածներն ու ընտրությունների մասին քննարկումները «կջրվեն-կգնան»՝ «Դուք կողմ եք քվեարկել մեր թեկնածուին, մենք էլ՝ դեմ ենք քվեարկել»։

Հաշիվը՝ մեկ-մեկ։

Ընդհանրապես, ԱԺ-ում հարցերը հենց այս հաշվարկներով էլ քննարկման են դրվում և ձևական «ոչ»-եր ու «դեմ»-եր նկարվում։ Օրինակ՝ երբ «Ելք» խմբակցության պատգամավոր Արամ Սարգսյանից փորձել են ճշտել, թե միգուցե հենց նա՞ է «Ելք»-ում կողմ քվեարկել Գագիկ Հարությունյանին՝ հաշվի առնելով իրենց վաղեմի մտերմությունը, Արամ Սարգսյանը շատ անկեղծ խոստովանել է․

«Ինչո՞ւ պետք է կողմ քվեարկեի, երբ առանց դրա էլ ինքն ընտրվելու խնդիր չուներ․․․ Մտերմությունը՝ մտերմություն, բայց ես իրեն էլ նախապես ասել եմ, որ դեմ եմ քվեարկելու, ավելին՝ ասել եմ, որ մեր «դեմն» իրեն ավելի շատ կբարձրացնի, քան մյուսների «կողմը»․․․»։

Սա արդեն պարզ ճշմարտություն է և հաստատում է այն կարծիքը, որ ընդդիմությունն իր դեմքը չկորցնելու համար՝ ձևական «դեմ»-եր է նկարում և, միևնույն ժամանակ, դրանով ավելի է օգնում իշխանությանը՝ իր լեգիմիտությունը՝ օրինականությունը, պահելու գործում։

Ասել է թե՝ ճիշտ էին նաև Շարմազանովի խոսքերը, թե իշխանությունը փոխհամաձայնեցված աշխատում է ընդդիմության հետ։ Ստացվում է այնպես, որ «իրանցոնքով» հավաքվել ու ժողովրդին հիմարի տեղ են դնում։

Այստեղ ուզում ենք հիշել նաև հենց Արամ Սարգսյանի շատ սիրված խոսքերից մեկը․ «Տղե՛րք, ձե՞ռք եք առնում, ո՞ւմ վրա եք ծիծաղում, տղե՛րք»։

NEWSPRESS.am