«Արսենալի» կազմից «Մանչեսթեր Սիթիի» դեմ խաղում ամենաբարձր գնահատականը ստացել է Հենրիխ Մխիթարյանը

Երեկ Անգլիայի պրեմիեր լիգայի 28-րդ տուրում «Արսենալը» 0-3 հաշվով պարտվեց «Մանչեսթեր Սիթիին»։ Արսեն Վենգերի սաները ցուցադրեցին դժգույն ու վատ ֆուտբոլ։ Հեղինակավոր "Whoscored" սպորտային կայքն այդ հանդիպման լավագույն ֆուտբոլիստ է ճանաչել «Մանչեսթեր Սիթիի» դարպասապահ Էդերսոնին, ով հետ մղեց 11 մետրանոց հարվածը։

«Արսենալի» կազմում ամենաբարձր գնահատականը ստացել է հայազգի կիսապաշտպան Հենրիխ Մխիթարյանը, ում կայքը տվել է 6,92 գնահատականը։ Մխիթարյանը կատարում էր ճշգրիտ փոխանցումներ, կատարեց հարվածներ դարպասին, վաստակեց 11 մետրանոց հարված ու մի քանի անգամ հարվածային գոտի դուրս բերեց իր թիմակիցիներին, սակայն ամեն ինչ ապարդյուն։

Հատկանշական է, որ հանդիպման ժամանակ ամենաակտիվը երևում էր Մեզութ Օզիլը, սակայն նրա խաղում շատ է խոտանը։ Ֆուտբոլիստը շատ էր սխալվում, փորձում էր խաղն ամբողջությամբ իր վրա վերցնել, սակայն ամեն ինչ վատ էր ընթանում։

Հեղինակավոր կայքի հետ համամիտ էին նաև մասնագետներն ու «Արսենալի» երկրպագուները, ովքեր նշում էին, որ թիմի դժգույն խաղի ամենապայծառ կետը Մխիթարյանն էր։