ՀՅԴ-ը գործարքն ու Բալասանյանի ճակատի չորրորդ խարանը

Մամուլում շրջանառվող լուրերի համաձայն՝ ՀՅԴ-ում կարծում են, որ «երկարատև կոալիցիայի համար պետք է իրենց տրվի մեկ ամբողջ մարզ՝ համայնքների ղեկավարներով հանդերձ»։

Շրջանառվում է նաև այն մասին, որ Դաշնակցությունն աչքը դրել է Շիրակի մարզի վրա։ Չի բացառվում, որ ՀՅԴ ախորժակը բացվել է 4-րդ նախագահի հետ հանդիպումից հետո։ Ինչպես սովորաբար, այս անգամ էլ հնարավոր է տեղի է ունեցել «առևտուր»՝ ՀՀԿ-ՀՅԴ ձևաչափով․ «Դուք մեզ՝ Շիրակը, մենք ձեր թեկնածուին՝ ձայն»։ Այս վարկածի հավանականությունը չի բացառվում, սակայն հարկ է նկատել, որ եթե իրականում գործարք է տեղի ունեցել, ապա իշխող կուսակցությունը ստիպված կլինի հեռացնել պաշտոններից համայնքների ղեկավարներին։

Իհարկե, իր պաշտոնից զրկվելն ամենացավագինը կտանի Գյումրիի քաղաքապետ Սամվել Բալասանյանը, ով հանուն աթոռի ճակատը դարձրեց սևագիր։

Չի բացառվում, որ նրան «սփոփելու» համար կառաջարկեն այլ պաշտոններ։ Մասնավորապես, խոսք կա նրան Չինաստան «ուղարկելու մասին»։ Ու թեև ժամանակին Բալասանյանի կապերը վատ չեն եղել, սակայն դժվար է ասել, թե այսօր նա ինչ կարող է անել այնտեղ։ Այս առումով թերևս Բալասանյանը հեշտ ու հանգիստ չի զիջի իր տարիների «վաստակը»:

Հիշեցնենք, թե ինչպես պաշտոնի համար Բալասանյանը նախ անցավ «Օրինաց երկիր» կուսակցության շարքերը ու սկսեց կրել ՕԵԿ դաջվածքն իր ճակատին։ Սակայն այս դաջվածքը հետագայում այնքան բարոյալքված դուրս եկավ, ինչպես այն կրողները, ովքեր հրաժարվում էին դրանից։

Բալասանյանն էլ ՕԵԿ-ը փակեց ԲՀԿ դաջվածքով և սկսեց բարգավաճել։ Բայց երբ պահը հասունացավ, ու «Բարգավաճ Հայաստանը» մի պահ զրկվեց իր որոշ լծակներից, Բալասանյանը շատ արագ լքեց ԲՀԿ նավը։ Իսկ վերարտադրվելու համար նա ընտրեց Հանրապետականի տաքուկ ու ապահով անկյունը, և 2016-ին ՀՀԿ ցուցակը գլխավորելով՝ դարձյալ մնաց քաղաքապետի պաշտոնում։ Հիմա, եթե ՀՅԴ-ն իսկապես մարզը «գրավելու» հարց է դրել իշխող կուսակցության առջև, ապա այստեղ արդեն ՀՀԿ դաջվածքը Բալասանյանին չի փրկի պաշտոնազրկումից։ Նա առնվազն պետք է մտածի նոր «տատու»-ի մասին՝ ՀՅԴ մակագրությամբ։

Ի դեպ, 2016-ին, երբ Հանրապետականի ցուցակը գլխավորելու հարցի շուրջ Բալասանյանը դեռ բանակցային փուլում էր, խոսք կար նաև Բալասանյանին ՀՅԴ ցուցակով առաջադրվելու մասին: Եվ այն ժամանակ ՀՅԴ վերնախավը դեմ չի եղել։
Թե ինչպես այս անգամ Բալասանյանին կհաջողվի իր տակ երերացող աթոռը պահել, նա դեռ մտմտում է։ Թեև պրպտումները պսակվել են միայն մի ելքով՝ նոր դաջվածքով, որը նրա ճակատի գիրն է ու նաև խարանը։

NEWSPRESS.am