Կարապետյանը լավ էկոնոմիստ ա, բայց ղարաբաղյան հարց ունենք. Սարոյանի անփոխարինելու թեկնածուն Ս. Սարգսյանն է

Հանրապետական  կուսակցության ներսում վարչապետի թեկնածուի հարց չի քննարկվել: Այդ մասին այսօր Ազգային ժողովում լրագրողների հետ զրույցում ասաց Հանրապետական խմբակցության պատգամավոր, գեներալ Սեյրան Սարոյանը: 

Հարցին, թե ըստ նրա՝ Սերժ Սարգսյանը կլինի՞ վարչապետ, Սարոյանը պատասխանեց. «Ես մի անգամ ասել եմ, նորից եմ կրկնում՝ սաղ ազգով Աստված կանչենք, մենակ էդ մարդը գա: Համ ասում եք՝ Ալիևը Երևան ա ուզում, համ էլ ասում եք՝ Սերժ Սարգսյանը թող գնա տուն: Բա մեր վիճակն ի՞նչ ա ըլնելու»: 

Լրագրողի դիտարկմանը, թե փաստորեն ստացվում է, որ Սերժ Սարգսյանն «ի հեճուկս» Ալիևի՞ է ցանկանում վարչապետ դառնալ, պատգամավորն ասաց. «Պրիչոմ տուտ Ալիևը: Որ Ալիևը չլներ, Սերժ Սարգսյանը մեզ պետք չէ՞ր գալու: Հա՞, ըտենց 100 հատ ունե՞նք էս երկրում: Ըտենց նախագահ ունե՞նք»:

Դիմելով հարցն իրեն ուղղած լրագրողին՝ Սարոյանը հարցրեց. «Դու՝ որպես հայ, քեզի լավ չե՞ս զգում, որ մեր նախագան էդ միջազգային հանրության դեմ ելույթ ա ունենում ու ճիշտ ձևով ներկայացնում ա մեր պետությունը: Քեզի դուր չի՞ գալիս՝ որպես հայ: Դու քեզի՝ որպես տղու, ուժեղ չե՞ս զգում»:

Դիտարկմանը, թե մարդիկ արտագաղթում են երկրից, գեներալն ասաց. «Կգնան էլ, կգան էլ, մթոմ Սերժ Սարգսյանի երեսի՞ց են գնում»: 

Անդրադառնալով Սերժ Սարգսյանի՝ վարչապետ դառնալ-չդառնալուն, Սարոյանը նկատեց, որ հնարավոր է նույնիսկ Սարգսյանը չի էլ ուզում դառնալ վարչապետ, բայց ինքը՝ Սարոյանը շատ կուզեր, որ Սարգսյանը դառնար վարչապետ. «Իմ համար ինքը անփոխարինելի թեկնածու ա»: 

Հարցին էլ, թե գործող վարչապետ Կարեն Կարապետյանը վա՞տ է աշխատում, պատգամավորը պատասխանեց. «Ես տենց բան ասեցի՞: Կարեն Կարապետյանը շատ լավ էկոնոմիստ ա, լավ վարչապետ, բայց մենք ղարաբաղյան խնդիր ունենք: Ո՞վ էգուց պիտի էթա միջազգային ատյաններում վիճաբանության մեջ մտնի»:

Լրագրողների ճշտող հարցին, թե ղարաբաղյան հարցն այն ժամանակ չկա՞ր, երբ Սարգսյանը հայտարարում էր, թե որևէ պաշտոնի չի հավակնում. Սարոյանը վրդովվեց. «Ա՛յ մարդ կա, հիմա էլ կա: Ի՞նչ գիտես՝ Սերժ Սարգսյանը գալո՞ւ ա, թե՞ չի գալու: Կրակն ընկա՞վ: Կարո՞ղ ա՝ էսի տղայական բազար ա՝ բերնից խոսքը հելավ, պիտի մինչև վերջ անի, յանիմ ինչ եք է կպել: Կյանք ա, փոխվում ա»: