«Ժամանակ». Շարքային Սարգսյանի օրագիրն ու ծրագիրը

«Ժամանակ» թերթը գրում է.

«Սերժ Սարգսյանը շարքային կուսակցական է և պետք է ենթարկվի կուսակցության որոշումներին, խորհրդարանում հայտարարել է ՀՀԿ խմբակցության ղեկավար Վահրամ Բաղդասարյանը՝ անդրադառնալով 2014 թվականին Սարգսյանի արած հայտարարությանը, թե չի հավակնում վարչապետի պաշտոնին: Վահրամ Բաղդասարյանն ասել է, թե իրենք հավակնություններով կամ ցանկություններով չեն առաջնորդվում և իշխանության պատասխանատվությունը ստանձնած կուսակցություն են, ու իրենք են որոշում, թե որ պաշտոնն ով պետք է զբաղեցնի:

Որևէ այլ իրավիճակում, անշուշտ, մեղմ ասած զավեշտալի կլիներ պատկերացնել որևէ ՀՀԿ-ականի, որը կասեր, թե Սերժ Սարգսյանը շարքային կուսակցական է և պարտավոր է ենթարկվել կուսակցության որոշումներին՝ անկախ իր ցանկություններից: Բայց տվյալ պարագայում այդ հանգամանքը դարձել է Սերժ Սարգսյանի «դեմքը փրկելու» միակ տարբերակը, 2014-ին նրա արած հայտարարությունից հետո:

Բանն այն է, որ Սարգսյանի վարչապետության համար մնում է միակ «տրամաբանական» տարբերակը՝ ՀՀԿ պարտադրանք, անկախ իր կամքից, զուտ կուսակցական կարգապահության շրջանակում: Որովհետև «ազգովի խնդրանքի» տարբերակը շատ ավելի ծիծաղելի կստացվեր, իսկ Սերժ Սարգսյանի «կամքով» վարչապետությունը՝ շատ անհարմար: Միակ տարբերակը ՀՀԿ որոշումն է, պարտադրանքը, որին իբրև շարքային ենթարկվում է Սերժ Սարգսյանը: Իհարկե, երևի թե դա կլինի առաջին ու վերջին դեպքը, երբ Սերժ Սարգսյանն է ենթարկվում ՀՀԿ-ին, ոչ թե հակառակը:

Եվ դա էլ, իհարկե, կլինի Սերժ Սարգսյանի կամքով, որտեղ էական նշանակություն կունենա թերևս ոչ այնքան հանրության առաջ որևէ տրամաբանական բացատրություն գտնելը, այլ նաև միջազգային հանրությանը ներկայացնելը, որ Սարգսյանը ոչ թե գնում է իշխանությունը պահելու, այսպես ասած, «խանական» տարբերակով, այլ ընդամենը դասական «քաղաքագիտական»՝ իշխող կուսակցությունն իր նախագահին թելադրում է վարչապետի պաշտոնի վերաբերյալ որոշում:

Ինչ խոսք, հազիվ թե արտաքին ուժային կենտրոններում որևէ մեկի համար այդ «քաղաքագիտությունը» լինի համոզիչ, բայց մյուս կողմից էլ այստեղ կա մի առանցքային խնդիր՝ այդ կենտրոնները կանգնած են Հայաստանում իշխանության պատասխանատվության ճգնաժամի առաջ: Այսինքն՝ չկա մարդ, որը հավակներ այդ պատասխանատվությունը ստանձնելուն»:

Մանրամասները՝ թերթի այսօրվա համարում