Նիկոլին «գործուղել» են փողոց. առանց պայմանավորվածության` թույլ չէին տա

Ասում են՝ «Ելք»-ում լարված իրավիճակ է և դաշինքը մասնատման եզրին է։

Այն, որ «Ելք»-ը նման տեմպերով երկար չի ձգի ու կքանդվի, կանխատեսումներ արվել են դեռ նախորդ տարի։ Մասնավորապես Հանրապետական խմբակցության ղեկավար Վահրամ Բաղդասարյանն ասել էր.

«Համբերեք մինչև 2018 թվական և կտսնենք՝ կքանդվի»։

Թերևս նրա այսչափ վստահությունը կարող է իր պատճառն ունենալ․ չի բացառվում, որ բարկացած Բաղդասարյանը, պահի ազդեցության տակ, բացել է ընդդիմություն-իշխանություն պայմանավորվածության խաղաքարտերը՝ հայտարարելով «Ելք»-ի մասնատման և «լուծարման» մասին։ Մյուս կողմից էլ, հնարավոր է նաև, որ «Երկիր Ծիրանիի» կանանց ստեղծած «արտակարգ իրավիճակը» վախեցրել է Փաշինյանին։ Մի կողմից լուսանցքում չմնալու, մյուս կողմից էլ՝ կանանց տրվող անհայտ ծագումով հրահանգների դեմն առնելու համար, նրան որոշել են «գործուղել» փողոց։

Չի քննարկվում այն, որ իրականում չկա վստահություն ընդդիմադիր դաշտը ներկայացնող ուժերի միջև, քանի որ նրանք բոլորն աշխատում են ոչ թե մի նպատակի համար, այլ ինչ-որ այլ ուժերի՝ արտաքին ու ներքին։

Թե իրականում ում համար է խաղում «Երկիր Ծիրանին», և ում գնաց զեկուցելու Մարինե Խաչատրյանը, որ հանձնարարությունը կատարված է՝ դեռ ջրի երես դուրս կգա։ Սակայն մինչ այդ, Փաշինյանը ժամանակ չի կորցնում ու ժողովրդին ապացուցելու, նրանց իր կողմ քաշելու համար և ցույց տալու համար, որ ինքը պակաս ընդդիմություն չէ, որոշել է դեմ գնալ «ինստիտուցիոնալ» պայքարի կողմնակից Էդմոն Մարուքյանի դիրքորոշմանը։

Թեև դաշինքի անդամները պնդում են, որ իրենց բոլորի նպատակը մեկն է՝ տապալել Սերժ Սարգսյանի վարչապետությունը, սակայն որոշ տեղեկությունների համաձայն, այնուամենայնիվ, քննարկումները դաշինքում թեժ են եղել։ Ու չի բացառվում, որ միևնույն նպատակի շուրջ հավաքված քաղաքական գործիչներին բորբոքել է պայքարի վայրի մասին հարցը՝ որտե՞ղ պայքարել՝ քաղաքակա՞ն հարթակում, թե՞ փողոցում, որպեսզի կարողանան պահել ընդդիմադիրի իմիջը։

Ցանկացե՞լ է արդյոք Սասուն Միքայելյանը հարվածել Նիկոլ Փաշինյանին, թե՞ ոչ, և ի՞նչն է եղել պատճառը, պարզ չէ, սակայն մի բան մնայուն ճշմարտություն է՝ Նիկոլը, որպես ընդդիմություն, վերարտադրվելու և թիվ մեկը մնալու խնդիր ունի։ Դրա համար նա պատրաստ է փողոց դուրս գալ ու նույնիսկ, ինչպես ինքն է ասում, կրկին բանտարկվել։

Նիկոլն արդեն մի անգամ անցել է այս ճանապարհով և համոզվել, որ բանտում իր ձեռքերը կապված են։ Նրան դուրս են թողել, հավանաբար, հենց այն պայմանով, որ նախկին ոգեշնչվածությամբ պայքարի ու, որպես ընդդիմություն, պարի իրենց դուդուկի տակ։ Այնպես որ՝ այս անգամ նա հազիվ թե ցանկանա կրկին բանտարկվել։ Փաշինյանն այս կերպ միայն ընդդիմության նոր իմիտացիա կստեղծի և կգնա տուն քնելու, ինչպես մարտի մեկին արեց Լևոն Տեր-Պետրոսյանը՝ զենքի առաջ կանգնեցնելով ժողովրդին։

Ու այս համատեքստում էլ, իշխանությունն այնքան միամիտ չէ, որ թույլ տա որևէ ընդդիմադիրի փողոց դուրս գալ ու պայքարել իր դեմ, եթե դա նախապես պլանավորված չէ։

Իշխանության հետ պայմանավորվածություն չունեցողները՝ իրական պայքարողները բանտերում են՝ փակի տակ։

Փակված է Պավլիկը՝ իր մինուճար որդու հետ, փակված է Միայնակ գայլը՝ Արայիկ Խանդոյանը... և մյուսները, ովքեր փորձել են իսկապես պայքարել ու ժողովրդին հանել ճգնաժամային փոսից։

Իսկ Նիկոլն անպատիժ աղաղակում է ու գործուղվում փողոց. նա «դաբրո» ունի...

Արմինե Մկրտումյան