Իրանական գազը՝ ռուսական ջրաղացին

Արդեն որերորդ անգամ է` իրանական կողմը Հայաստանին հնարավորինս մատչելի լեզվով ոչ թե հասկացնում, այլ ասում է՝ ես քեզ գազ եմ տալիս՝ էժան-էժան, էլ ի՞նչ ես ուզում:

Դե Հայաստանն էլ չի կարողանում ասել՝ ախր ռուսներն իրենց գազն են ծախում մեզ վրա, որը ոչ միայն գազ է, այլ քաղաքականություն, եթե հրաժարվենք կամ պակասեցնենք ռուսական գազի մուտքը Հայաստան, ապա ՌԴ-ն դա կհամարի անձնական վիրավորանք, Հայաստանում ռուսական քաղաքականության տապալում, ինչը հայտնի չէ, թե ինչով կավարտվի․ է՛լ իշխանափոխություն, է՛լ իշխանազրկում։

Բացի այդ, Հայաստան են գործուղվել հայ-ռուսական «գազավիկներ», որոնք էլ ատամներով պահում են ռուսական գազե սապոգները։

Իհարկե, դեռևս գործում է գազ-էլէներգիայի դիմաց պայմանավորվածությունը, սակայն գազն Իրանը վաճառում է «Գազպրոմ-Արմենիային», ոչ թե Հայաստանին։

Այլ կերպ ասած՝ Հայաստանը տարբերակ չունի Իրանից գազ գնելու. նախ ՌԴ-ն չի թողնում, հետո նաև Հայաստանում «գազիֆիկացված» հայերը։

Երևի իրանցիները շատ են զարմացած, հարևանին էժան գազ են տալիս, հարևանն այնքան հիմար է, որ չի ցանկանում. գերադասում է թանկը։

Լավ, խելք չունեք, երևի մտածում են իրանցիները, բայց այդքա՞ն չունեք, այսինքն՝ բոլորովի՞ն չունեք։ Շատ բան տեսած իրանցիների համար երևի թե շատ զարմանալի իրավիճակ է։

Հիշեցնենք, որ ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանը, որը վարչապետ, նախկին «Գազպրոմ-Արմենիայի» ղեկավար Կարեն Կարապետյանի փեսան է, հայտարարել էր, որ Հայաստանն այս պահին չունի գազի գնի ավելի մրցունակ առաջարկ, քան Ռուսաստանինն է: Նա մոտավորապես Իրանին մեղադրել էր ավելի թանկ գազի գին, քան ռուսականն է առաջարկելու մեջ, իսկ ինչպես հայտնի է, իրանական գազը բավականին էժան ռեսուրս է: Հայկ Հարությունյանն այդ պահին չի կարողացել ներկայացնել ռուսական շահը, ասել է այն, ինչ եկել է մտքին՝ ամենավերջին պահին։

Մոտավորապես հասցրել է ասել, որ գազ կարող են Իրանից վերցնել միայն գազ-էլէնեգիայի դիմաց: Այսինքն՝ այն ծրագիրը, որը հաճո է Ռուսաստանին, ոչինչ ավելին։ Եթե Հայաստան է հոսելու իրանական գազը, ապա միայն ռուսական ջրաղաց։

NEWSPRESS.am