Իշխանության ընչաքաղցությունը, թալանն ու անտարբերությունը․ Թեղուտի աղետը (տեսանյութ)

Ասում են՝ հայրենիքն սկսում է յուրաքանչյուրիս տնից։ Հավանաբար, այս խոսքը Հայաստանի իշխանություններն ուղիղ իմաստով են հասկացել ու յուրաքանչյուրը սկսել է շենացնել ո՛չ թե իր երկիրը, այլ հենց սեփական տունը։

Իհարկե, լավ է, որ շենացնում են, վատն այն է, որ դա անում են երկրի բյուջեի, երկրի ընդերքի, օդի ու ջրի հաշվին։

Ցանկացած պետական այր թքած ունի, թե ուր է տանում երկիրն ու ժողովրդին՝ իր ընչաքաղցությամբ ու անվերջ թալանելու ձգտումով։ Թալանում ու վաճառում են հնարավոր ու անհնար ամեն ինչ, իսկ ստացված գումարներն ուղղում ո՛չ թե ժողովրդի կարիքներին ու երկիրը փոսից հանելուն, այլ անմիջապես իրենց գրպանը․ այն ավելի մոտ է։

Այսօրինակ խնդիրներից է Թեղուտի հանքարդյունաբերությունը, որի հասցրած վնասների մասին անգամ երևակայելն է դժվար։ Ու թեև «Վալեքս գրուպ» ընկերությունների խումբը հայտարարել է, որ ժամանակավորապես դադարեցնում է հանքի շահագործումը, սակայն դա ո՛չ թե տեղի բնակիչներին ու բնությանը հասցվող վտանգների, այլ հենց ընկերության առաջ ծառացած խնդիրների պատճառով։

Այնպես որ՝ կարճ ժամանակ անց, երբ ընկերությունը լուծի խնդիրը, աշխատանքները կշարունակվեն, մարդիկ զբաղվածության հարց չեն ունենա, բայց բնակչությանը սպառնացող աղետը կրկին վեր կհառնի։

Դեբեդ և Շնող գետերը, որոնցով հարակից գյուղերի բնակիչները ոռոգում են իրականացնում, ունեն աղտոտվածության ամենաբարձր՝ 5-րդ աստիճանը․ ծանր մետաղներից Դեբեդում բարձր է եղել մոլիբդենը և երկաթը:

Մի խոսքով՝ մեր հողն ու ջուրը կորցնում ենք և լռում, ու սա մեր երկրի ամենամեծ դժբախտությունն է։

Հայկ Բարսեղյանը ֆեյսբուքյան իր էջում տեսանյութ է տեղադրել, որտեղ հստակ երևում է, թե ինչ է մնացել Թեղուտի հանքից: Նա նաև ներկայացնում է, թե ուր են գնում հանքարդյունաբերության եկամուտները։

NEWSPRESS.am