Արտակարգ իրավիճակների նախարարության պերճանքն ու թշվառությունը

Վերջերս Արտակարգ իրավիճակների նախարար Դավիթ Տոնոյանը նոր մեքենա է գնել՝ նախարարական կարիքների համար: Ինչպես NEWSPRESS.am-ին տեղեկացրին ԱԻ նախարարության լրատվական ծառայությունից, մեքենան «Toyota Land Cruiser 200» է, «մեքենան գնվել է զեղչային համակարգով՝ իր շուկայական գնից շատ ավելի ցածր գնով»:

ԱԻ լրատվականից, սակայն, չներկայացվեց ո՛չ գինը, ո՛չ զեղչային համակարգը և թե ինչ միջոցներից է այն գնվել, միայն ասված է. «Մեքենան չի գնվել պետական բյուջեի միջոցներով, այլ ձեռք է բերվել Հայաստանի Հանրապետության օրենսդրությամբ չարգելված այլ աղբյուրներից ստացված միջոցների հաշվին»:

Ներեցեք, իսկ ՀՀ քաղաքացիները կարո՞ղ են օգտվել «Հայաստանի Հանրապետության օրենսդրությամբ չարգելված այլ աղբյուրներից ստացված միջոցներից». կարծում ենք՝ ոչ, քանի որ այս դեպքում կենթադրվեր, որ խոսքը ոչ օրինական ռեսուրսների մասին է:

Իսկ եթե օրինական ճանապարհով է ձեռք բերված «Toyota Land Cruiser 200» մեքենան, ապա նախարարության լրատվական ծառայությունն ինչո՞ւ այդ աղբյուրը  չի նշել: Կարելի՞ էր նշել աղբյուրը՝ նաև հետագա թյուրիմացությունից խուսափելու համար: Կարելի էր: Սակայն՝ ոչ:

«Մեքենան չի գնվել պետական բյուջեի միջոցներով, այլ ձեռք է բերվել Հայաստանի Հանրապետության օրենսդրությամբ չարգելված այլ աղբյուրներից ստացված միջոցների հաշվին: Մեքենան հանդիսանում է ՀՀ արտակարգ իրավիճակների նախարարության սեփականությունը»:

Նախարարությունը, փաստորեն, ո՛չ պետական միջոցներով, ո՛չ անձնական, ձեռք է բերել թանկարժեք մեքենա, որը հանդիսանում է ԱԻ նախարարության սեփականությունը: Այսինքն՝ կարելի է կախարդական խոսքեր ասել և ոչ պետական, սակայն օրինական միջոցներով տասնյակ հազարավոր դոլարների գույք ձեռք բերել և նվիրել որևէ գերատեսչության, իմա՝ ԱԻ նախարարությանը: Ինչևէ:

Անդրադառնանք կրճատումներին և ազատումներին:

Ըստ ԱԻ նախարարության լրատվական ծառայության՝

«2017թ.-ի ընթացքում ՀՀ արտակարգ իրավիճակների նախարարության փրկարար ծառայությունում կրճատվել է 60 հաստիք, և նույնքան հաստիք հայտարարվել է ՓԾ Քաղաքացիական պաշտպանության վարչությունում՝ ՀՀ Տավուշի մարզի 11 սահմանամերձ համայնքներում ստեղծված քաղաքացիական պաշտպանության հենակետերի անձնակազմն ապահովելու նպատակով:

ԱԻ նախարարության քաղաքացիական ծառայության համակարգում «Սեյսմիկ պաշտպանության ծառայություն» գործակալությունում, ՀՀ կառավարության թիվ 672-Ն որոշման համաձայն, կառուցվածքային փոփոխությունների արդյունքում կրճատվել է 10 հաստիք»:

2017 թվականի դեկտեմբերին փակվել է նաև «Արտակարգ» թերթը, որի աշխատակիցներից ոչ բոլորն այսօր աշխատանք ունեն: Ի դեպ, նրանք ևս աշխատանքից ազատման դիմում են գրել. այս խորամանկության «իմաստն» այն է, որ պայմանագրով նախատեսված գումարները կամ այն գումարները, որոնք հատկացվում են աշխատանքից ազատվելիս, երբ աշխատատեղը կրճատվում է, չվճարվեն:

ԱԻ աշխատակիցներից մեկն էլ, ով հասկանալի պատճառներով չցանկացավ ներկայանալ, իր դժգոհությունը հայտնեց NEWSPRESS.am-ի հետ զրույցում այն բանի համար, որ արդեն բավականին ժամանակ է՝ նախարարությունը համազգեստ չի տրամադրում: Երկար օգտագործվելուց հագուստները ողորմելի վիճակում են, իսկ երբ հարց է բարձրացվել հագուստների հետ կապված, նախարարությունից պատասխանել են՝ «բայովկեքով յոլա գնացեք», իսկ այս հագուստները կրում են հրդեհ հանգցնելիս և հարմար չեն առօրյա գործածության համար:

Պարզվում է նաև, որ համակարգում կան թափուր աշխատատեղեր, մասնավորապես՝ հրշեջների, սակայն աշխատում են որևէ մեկին աշխատանքի չվերցնել:

ԱԻ աշխատակիցը նաև պատմեց, որ փրկարարներն այժմ «Գազելներով» են սպասարկում կենցաղային ահազանգերը, ամբողջ օրը մեքենաների մեջ են անցկացնում, սակայն ո՛չ աշխատավարձն են բարձրացնում, ո՛չ համազգեստ տալիս. աշխատավարձն, ի միջի այլոց, ընդամենը 80 հազար դրամ է:

Եթե որևէ փաստաթուղթ է պետք նախարարությունից վերցնել, ապա պետք է համազգեստով ներկայանալ, իսկ համազգեստները երբեմն այնքան ողբալի վիճակում են, որ մարդիկ անհարմար են զգում դրանք հագնել:

Ո՞րն է մեր հրապարակման նպատակը:

Մի կողմից՝ նախարար Դավիթ Տոնոյանը հնարավորություն ունի թանկարժեք մեքենա ձեռք բերելու, որն, ի՞նչ խոսք, անհրաժեշտություն է ԱԻՆ-ի համար, սակայն սեփական նախարարության աշխատակիցներին չի կարողանում անգամ համազգեստով ապահովել: Նախարարությունում, ի վերջո, կրճատումներ են եղել, սակայն կան թափուր աշխատատեղեր, որոնք չեն համալրվում: