Մարտ ամսին ազնվացեղ եղջերուները կտեղափոխվեն Հայաստան

Մեկ ամսից Իրանից Հայաստան կհասնի չորս ազնվացեղ եղջերու։ Այս մասին NEWSPRESS.am-ին տեղեկացրեց Բնության համաշխարհային հիմնադրամի հայաստանյան գրասենյակի ղեկավար Կարեն Մանվելյանը։

Նա նաև նշեց, որ կարգավորվել են փաստաթղթային հարցերը, պայմանավորվածություն կա նաև Իրանի սահմանից դեպի Դիլիջան տեղափոխող ընկերության հետ, սպասում են՝ եղջերուները հասնեն Հայաստան։

Բացի այդ, համալրելու համար ՀՀ եղջերուների քանակը, մրցույթ է հայտարարվել ևս 6 եղջերու ձեռքբերելու համար։

Նշենք, որ 2000-ականներից Հայաստանում մեկնարկել է Կովկասյան ազնվացեղ եղջերուի վերաբնակեցման ծրագիր: Հայաստանում կովկասյան ազնվացեղ եղջերուն (Cervus elaphus maral) լայն տարածում ուներ 19-րդ դարի վերջին և զգալի թվով հանդիպում էր հյուսիսային և հարավային անտառներում, այդ թվում՝ «Դիլիջան» ազգային պարկում, Բարգուշատի և Զանգեզուրի լեռնաշղթաներում: Երկար ժամանակ կովկասյան ազնվացեղ եղջերուն հանդիպում էր Սյունիքի մարզի Մեղրու, Բարգուշատի և Զանգեզուրի լեռնաշղթաներում, սակայն արդեն 50-ականներին տարածքից անհետացավ: Այժմ որոշ առանձնյակներ պարբերաբար հայտնվում են «Դիլիջան» ազգային պարկում: Տեսակն ընդգրկված է 2010-ի ՀՀ կարմիր գրքում՝ որպես «կրիտիկական վիճակում գտնվող» տեսակ:

WWF հայաստանյան մասնաճյուղը ՀՀ բնապահպանության նախարարության հետ միասին, Կովկասի բնության հիմնադրամի, Անդրսահմանային միացյալ քարտուղարության (TJS) , WWF-Գերմանիայի, և HSBC Հայաստանի ֆինանսավորմամբ, իրականացնում է Հայաստանում կովկասյան ազնվացեղ եղջերուի վերաբնակեցման ծրագիր, որի հիմնական նպատակն է «Դիլիջան» ազգային պարկում հիմնել նշված տեսակի կենսունակ վերարտադրվող խումբ:

Դիլիջան ազգային պարկում արդեն տարածքը պատրաստ է՝ եղջերուներին պահպանելու համար։