Գառնեցի Շմավոնի ընտանիքը փորձանք է դարձել և՛ գյուղի, և՛ Գառնու ձորի գլխին

Գառնիի ձորը ևս մեկ անգամ ենթարկվում է փորձության։ Այս անգամ Քարերի սիմֆոնիայի հարակից տարածքում կառուցվում է ժամանցի կենտրոն։

Ըստ NEWSPRESS.am-ի տեղեկությունների` զվարճանքի կենտրոնը կառուցում է Ծովինար անունով մի կին, ով Գառնիում հայտնի ատամնաբույժ Շմոյի կամ Շմավոն Համբարձումյանի աղջիկն է, իսկ տարածքը նա գնել է նախկին գյուղապետ Աշոտ Վարդանյանի ժամանակ։

Գառնիում դժգոհ են կառույցից, քանի որ այն ոչ միայն խաթարում է զբոսաշրջային էկո-տարածք համարվող ձորը, այլև խախտում է կանաչ տարածքի ներդաշնակությունը։ Չմոռանանք նաև, որ ոչ հեռու գտնվում է Խոսրովի արգելոցը։

Հիշեցնենք, որ Գառնիի ձոր իջնելու համար տարիներ շարունակ Շմավոն Համբարձումյանը և նրա տարեց հայրն ապօրինի գումարներ էին գանձում, և ոստիկանությունը տարիներ շարունակ պայքարում էր նրանց դեմ, սակայն ապարդյուն։

Հայր ու որդի Համբարձումյաններն արգելապատնեշ էին դրել ձորի մուտքի մոտ և ձոր իջնող քաղաքացիներից 2 հազար դրամ էին գանձում։

Հիշեցնենք, որ 2017-ին Շմավոն Համբարձումյանի եղբայրը՝ Միշա Համբարձումյանը, դիմել էր ոստիկանություն, ահազանգելով, որ եղբայրը՝ Շմավոնը, իր այգու 35 ընկուզենու բերքը գողացել է՝ իրեն պատճառելով խոշոր նյութական վնաս։

Դեռևս 2013-ին ՀՀ բնապահպանության նախարարության՝ «Խոսրովի անտառ» պետական արգելոց պետական ոչ առևտրային կազմակերպության տնօրենի թափուր պաշտոնի համար հայտարարած մրցույթի մասնակիցներից մեկը Լուսինե Վանիկի Կարապետյանն էր, ով հենց այս Շմավոն Համբարձումյանի կինն է:

Բացի այդ, Շմավոն Համբարձումյանը հաճախ էր հայտնվում խմբագրություններում կամ ոստիկանությունում՝ բողոքի այս կամ այն խնդրով. նա ապօրինությունների մի ողջ աստղաբույլ ունի իր կենսագրության մեջ։

Գյուղում պատմում են, որ նա եղել է Թուրքիայում, ցանկացել մնալ այդ երկրում, սակայն նրան հետ են ուղարկել, որոշ ժամանակ անցկացրել է Ազգային անվտանգությունում, որ կնոջը տարիներ առաջ ուղարկել է ԱՄՆ՝ այնտեղ ծննդաբերելու համար և այլն։

Ծովինար Համբարձումյանը պարզապես շարունակում է տոհմի «բարի» ավանդույթները։

Իհարկե, մեղավորը նախկին գյուղապետ Աշոտ Վարդանյանն էր, ով նրան նման թույլտվություն է տվել։

Հիշեցնենք, որ Քարերի սիմֆոնիան ընդգրկված է բնության հուշարձանների ցանկում և պահպանվում է պետության կողմից։

NEWSPRESS.am

qarer-simphonia

Լուսանկարը՝ Gor Ayzak Hovhannisyan-ի ֆեյսբուքյան էջից