«Վաբշե էլ ինձ չզանգեք». Ջանֆիդայի բժշկուհու հովանավոր փեսան և նրա սպառնալիքները

Օրեր առաջ NEWSPRESS․am-ն անդրադարձել էր Արմավիրի մարզի Ջանֆիդա գյուղի բժշկուհի Վարդուհի Բարեյանի մասնագիտական թերացումներին։ Մեզ ահազանգել էին տեղի բնակիչները և դժգոհում էին, որ Վարդուհի Բարեյանը չի պատասխանում իրենց զանգերին և հարկ եղած ժամանակ տնայցեր չի կատարում։

Ավելի ուշ մեզ զանգահարեց Վարդուհու ամուսինը՝ Հայկ Առաքելյանը։ Նա հերքում պահանջելու կամ կնոջ պատիվը պահելու փոխարեն՝ դժգոհեց, թե ինչո՞ւ ենք իր նկարը տեղադրել հոդվածում։

Այս զանգին հաջորդեցին ակտիվ մեկնաբանություններ և սպառնալիքներ հրապարակված նյութերի ներքո։ Ի դեպ, մեկնաբանությունները գրում էին ո՛չ թե կոնկրետ անհատներ, այլ ֆեյքեր՝ վիրավորելով ամենավերջին խոսքերով։

Մենք փորձեցինք կապ հաստատել և խնդրի շուրջ զրուցել համայնքի ղեկավարի հետ, սակայն՝ ապարդյուն․ ավելի ուշ պարզվեց, որ գյուղապետը, ինչպես ասացին, վատառողջ է և հիվանդանոցում «սիստեմաներ» է ընդունում։

Մեզ հաջողվեց կապ հաստատել գյուղապետարանի աշխատակազմի ղեկավար Վահան Հովհաննիսյանի հետ։

Ներկայացանք, որ լրատվական կայքից ենք և հարցրինք, թե տեղյա՞կ է արդյոք Ջանֆիդայի բժշկուհու մասնագիտական թերացումներին ու մեր հրապարակած նյութին և նաև այն մեկնաբանություններին, որոնք տեղ են գտել հրապարակման ներքո՝ ֆեյսբուքյան ֆեյքերի կողմից։

«Շատ էլ լավ են արել ու վաբշե՝ էլ ինձ չզանգե՛ք»,-զայրացած ու ագրեսիվ տոնով ասաց Հովհաննիսյանը։

Հարցին, թե ինչո՞վ է պայմանավորված նրա ագրեսիվ տոնը, Հովհաննիսյանը պատասխանեց․

«Բա ինչի՞ չէիք գեղից մեկին գալիս հարցնըմ, դուք ինձ զանգե՞լ եք, գեղի ղեկավարին զանգե՞լ եք, որ տենց բան եք գրել․ սխալ ինֆորմացիա եք տարածել»։

Պատասխանեցինք, որ գյուղից մեզ կոնկրետ մարդիկ են դիմել, ովքեր մինչ այդ դիմել են բժշկուհուն և նրա բուժօգնությանը չեն արժանացել, իսկ գյուղապետի հետ կապ հաստատել չի հաջողվել։

«Ո՛չ, դուք սխալ ինֆորմացիա եք տարածել»,-պնդեց Հովհաննիսյանը։

Հարցրեցինք՝ եթե վստահ եք, որ կեղծ և սուտ ինֆորմացիա է, ապա ինչո՞ւ չէիք զանգահարում և հերքում պահանջում կամ սպառնում, որ սուտ ինֆորմացիայի համար պատիվ կպահանջեք կամ դատի կտաք, ինչին ի պատասխան՝ Հովհաննիսյանը պահանջեց անուններ տալ։

«Դե անուն առ անուն ասե՛ք, ովքե՞ր են ձեզ ասել, որ բժշկուհին լավ չի աշխատում, ասեք՝ էդ ովքե՞ր են»,-իր հարցադրումն էր պնդում և պատասխան պահանջում Հովհաննիսյանը։

Հարկ ենք համարում նկատել, որ ելնելով աղբյուրին չբացահայտելու մեր իրավունքից և այն հանգամանքից, որ մարդիկ՝ իրենք, չէին ցանկանում բացահայտել իրենց՝ զերծ ենք մնում մեզ հետ զրույցի բռնված և բժշկուհու աշխատանքից դժգոհած մարդկանց անունները հրապարակելուց։

Դա մենք բացատրեցինք նաև հիշյալ պաշտոնյային, սակայն նա միևնույնն է՝ պնդում էր, որ անուններ տանք։

«Կամ էլ էկեք գյուղ, հլա տենանք՝ էդ ովքե՞ր են ձեզ տենց բան ասել»,-սպառանալից տոնով ասաց Հովհաննիսյանը։

Հարցին՝ Դուք մեզ սպառնո՞ւմ եք՝ Հովհաննիսյանը պատասխանեց․ «Չէ, ինչի՞ եմ սպառնում, ես ի՞նչ իրավունք ունեմ սպառնալու․․․ ես չգիտեմ՝ դուք ինչ լրատվամիջոց եք, բայց մենք մեր գյուղում մեզ համար աշխատում ենք»,-ասաց նա ու անջատեց հեռախոսը։

Քիչ անց պարզեցինք, որ նույն այդ Հովհաննիսյանի կինը, բժշկուհի Վարդուհու հարազատ հորեղբոր աղջիկն է, այսպես ասած՝ Հովհաննիսյանի քենին, որն էլ մեզ շատ հարցերի պատասխաններ տվեց։

Ստացվում է, որ ազգականներն իրենց ձեռքն են վերցրել գյուղն ու մարդկանց պահում են բռի մեջ՝ հավանաբար նրա համար, որ ճզմելն ավելի հեշտ լինի։

Ու այստեղ արդեն պարզ է դառնում նաև, թե ինչո՞ւ մեզ հետ զրուցած ոչ մի գյուղացի չէր ցանկանում հրապարակել իր անունը․ չի բացառվում, որ նրանք վախենում էին «ինքնադատաստանից»։ Ու արդեն զարմանալի չէ նաև, թե ինչու և՛ բժշկուհին, և՛ նրա փեսա պաշտոնյան մեզնից ո՛չ թե հրապարակման հերքում էին պահանջում, այլ անուններ։ Ինչպես ասում են՝ ձուկը գլխից է հոտած։

Հ․Գ․ մեզ մոտ կան բոլոր խոսակցությունների ձայնագրությունները։

NEWSPRESS.am