ԱՄՆ-ի «Ոսկե դարպասներ»-ը, Երևանի Կիևյան ու Դավիթաշենի կամուրջները՝ ինքնասպանության խորհրդանիշ դարձած վայրեր

Ամբողջ աշխարհում ինքնասպանության ամենահայտնի վայրերը կամուրջներն են։ Բարձրությունն իր ձգողականությամբ քաշում է ինքնասպաններին։ ԱՄՆ-ում գտնվող «Ոսկե դարպասներ» կամուրջն աշխարհում հայտնի է որպես ինքնասպանության ամենատարածված վայրերից մեկը։

Վիճակագրությունը ցույց է տալիս, որ յուրաքանչյուր 2 շաբաթը մեկ այնտեղ մարդիկ ինքնասպանություն են գործում։ Ոչ պաշտոնական տվյալներով՝ վերջին յոթ տասնամյակում կամրջից ընկնելու միջոցով ինքնասպան է եղել ավելի քան 1200 մարդ։ 2005 թվականին «Ոսկե դարպասներ» կամրջի տնօրենների խորհուրդը 15 ձայնով կողմ քվեարկեց կամուրջը ցանկապատելուն։

Հայաստանում վերջին մի քանի տարում ավելացել են ինքնասպանության դեպքերը։ Մասնագետներն այդ ամենը կապում են երկրում տիրող սոցիալական վիճակի ու մարդկանց հոգեբանական վիճակի հետ։ Բավական է հետևել հայաստանյան մամուլին ու տեսանելի կլինի, որ յուրաքանչյուր ամիս ինքնասպանության դեպքեր են տեղի ունենում Երևանի Կիևյան ու Դավիթաշենի կամուրջներից։

Փաստացի յուրաքանչյուր 2 շաբաթը մեկ «Ոսկե դարպասներ» կամրջից տեղի է ունենում ինքնասպանության դեպք։ Գրեթե նույն վիճակն է նաև Հայաստանում։ Պարզից էլ պարզ երևում է, որ աշխարհում հայտնի ինքնասպանության ամենատարածված վայրերից մեկում ու Երևանի Կիևյան ու Դավիթաշենի կամուրջներից կատարվող ինքնասպանության դեպքերի թիվը գրեթե հավասար է։

Վերջին տասնամյակներին աշխարհի տարբեր երկրներում սկսեցին ցանցապատել հիմնականում այն կամուրջները, որոնք դարձել են ինքնասպանության խորհրդանիշներ։

Մասնագետները նշում են, որ ինքնասպանության վայրերում պաշտպանիչ գործողություններ իրականացնելուց, կամուրջներում արգելապատնեշ ու ցանցեր դնելուց հետո այդպիսի դեպքերը նվազում են։ Մյուս կողմից էլ հոգեբանները նշում են, որ ինքնասպանություն գործել ցանկացող մարդուն չի կանգնեցնի ոչինչ։ Բայց փաստացի կարելի է նշել, որ աշխարհի տարբեր երկրներում ինքնասպանության խորհրդանիշ դարձած կամուրջների ցանցապատումից հետո այդ տեղերում ինքնասպանության դեպքերի թիվը կտրուկ նվազել է։