Չինովնի՞կ, թե՞ գծատեր. Արման Սահակյանը նեղսրտած է

Դեռևս ապրիլ ամսին վարչապետ Կարեն Կարապետյանն իրեն հատուկ ոճով ելույթ ունեցավ կառավարության նիստի ընթացքում և հորդորեց ներկաներին, մասնավորապես, Պետական գույքի վարչության պետ Արման Սահակյանին՝ դուրս գալ չինովնիկի կարգավիճակից:

«Ձեզնից ակնկալում եմ բարեփոխումների ծրագիր, որի պարագայում ձեր կոմիտեն կդառնա կոմերցիոն առումով լավ գործակալություն, որը կառավարում է մեր գույքը, իսկ այն գույքը, որ մեզ այսօր պետք չէ, վաճառում է, ու այդ գործակալությունը գործում է բիզնեսի բոլոր կանոններով: Չինովնիկի կարգավիճակից դուրս եք գալիս, դառնում եք ագրեսիվ գործակալություն»,- ասաց Կարեն Կարապետյանը:

Այսօր Սահակյանի ասուլիսի ժամանակ լրագրողները չէին մոռացել և նրան հիշեցրին իր՝ չինովնիկի կարգավիճակ ունենալու մասին. «Վարչապետ Կարեն Կարապետյանի բոլոր հանձնարարականները կատարվում են ամբողջությամբ, իսկ չինովնիկի կարգավիճակից դուրս գալը, կարծում եմ, ինձ հետ կապ չուներ: Զգո՞ւմ եք՝ ես այդքան չինովնիկի կարգավիճակ ունե՞մ: Չեք զգում, ավելի լավ»:

Հետաքրքիր է, որ ողջ կյանքում չինովնիկ աշխատած Արման Սահակյանին մտահոգում է նման որակումը: Կարելի՞ է իրեն, օրինակ, գծատեր անվանել, չէ՞ որ կա մի վարկած, որ իրեն և իր հորը՝ Գալուստ Սահակյանին, երթուղայինի մի քանի գիծ է պատկանում, թե՞ այդ որակումից էլ կնեղսրտի Սահակյանը, դժվար է ասել, բայց որ վարչապետի այդ ելույթը դիպուկ էր, և Սահակյանն իսկապես լուգայած օձիքով չինովնիկ է և այդպես էլ իր կյանքում ոչ մի պրոգրես չի ապրել ու մնացել է այդ չինովնիկի կարգավիճակում, միանշանակ է:

Արման Սահակյանն իր ասուլիսի ժամանակ անդրադարձավ նաև իր և վարչապետի հարաբերություններին: Հարցի վերաբերյալ Արման Սահակյանը միանշանակ պաշտպանողական ռեակցիա տվեց՝ միանգամից նշելով, որ իրենց հարաբերությունները լավ են:

Պետք է նկատել, որ վարչապետը, որպես թույլ օղակ, հաճախ է ընտրում Սահակյանին և երբ մի զգլխիչ հայտարարություն է ուզում անել, որ այդ օրն էլ գրավի մեդիան, «կպնում է» կամ Արծվիկ Մինասյանին կամ Արման Սահակյանին, ինչը, օրինակ, երբեք չի անի ԱԱԾ պետ Կուտոյանի կամ ոստիկանապետի դեպքում:

NEWSPRESS.am