Քաղաքապետարանում կյանքն ուրախ է, ապրուստը՝ ձրի

Երևանի փողոցներում քայլելիս երբեմն հարց է առաջանում, թե ինչո՞ւ է մեր քաղաքն այսպիսին՝ փնթի, անկարգ, անկանոն ու անտեր, չէ՞ որ կան քաղաքապետարանը և թաղապետարանները։ Պարզվում է, որ քաղաքապետարանը ոչ միայն միլիոնավոր դոլարներ է ծախսում՝ առանց պատճառի, այլև քաղաքապետարանում ձանձրույթից և անգործությունից զբաղվում են թղթախաղով։

Քիչ թե շատ քաղաքակիրթ երկրում նման կերպ աշխատող քաղաքապետարանը կբեռնաթափեին բլոտամոլներից, սակայն Հայաստանում երևի իշխող օղակներում նախանձում են քաղաքապետարանին, որ մարդիկ պարապ-սարապ զբաղված են միայն իրենց հաճույքները վայելելով, իսկ ոմանք, գտնվելով հանրության ուշադրության կենտրոնում՝ հանրությանն են զբաղեցնում։

Եվ որպեսզի քաղաքապետարանում կարողանան հանգիստ իրենց հաճույքները վայելել, որոշվել է այնպես անել, որ լրագրողների մուտքը քաղաքապետարան սահմանափակվի. եթե թղթախաղով են զբաղվում, ապա չի բացառվում մնացած 6 մեղքերը ևս «շրջանառվում են» քաղաքապետարանում. հաճույքները՝ ողջ փաթեթով։ Որը՝ բլոտ, որը՝ կոնյակ, որը՝ երկարոտն գեղեցկուհի:

Ի դեպ նշենք, որ քաղաքապետարանում «դրես-կոդ» չի գործում, և երկարոտն գեղեցկուհիները կամ ծանոթ-բարեկամներով քաղաքապետարանում հայտնված համալսարանավարտ տառաճանաչները լրացնում են քաղաքապետարանի մեղքերի տրցակը։

Իսկ քաղաքապետարանում շրջանառվող խմիչքների «աստղաբույլի» վերաբերյալ ոչ միայն խոսակցություններ կան, այլև կոնկրետ թվեր, թե ինչքան են ծախսում։ Երբեմն կոնյակների վրա կառույցի ծախսը հասնում է միլիոնների, և այդքանից հետո կարելի է պատկերացնել, թե ինչ վիճակով են քաղաքապետարանի աշխատակիցները գնում տուն․ երգ ու պարով՝ 88-ով։

Ավելին՝ քաղաքապետարանում որոշել են միայնակ վայելել իրենց հաճույքները, իսկ ԶԼՄ-ները և հանրությունը չեն թողնում, որ քաղաքապետարանցիները հանգիստ ապրեն և կյանքը վայելեն այնպես, ինչպես իրենք են ցանկանում։

Սեր, թղթախաղ, աղջիկներ․ կյանքն ուրախ է, ապրուստը՝ ձրի. էլ ի՞նչ աշխատանք, ի՞նչ բան։

NEWSPRESS.am