Պարո՛ն Նախագահ, կծառայեմ

Երեկ նախագահական նստավայրից եկած պաշտոնական հաղորդագրությունից հայտնի դարձավ, որ Արմեն Սարգսյանն ընդունել է Սերժ Սարգսյանի առաջարկը հետևաբար խորհրդարանում ընտրվելուց հետո կկարգվի Հայաստանի չորրորդ նախագահ:

Սարգսյանն իր համաձայնությունը տվել է այն բանից հետո, երբ հանդիպել է հասարակական և քաղաքական սեկտորի հետ: Պաշտոնական տեսանյութում Սարգսյանը ներկայացնում է իր հանդիպումները, որտեղ էլ մի նրբություն աչք ծակեց, Արմեն Սարգսյանն անընդհատ խոնարհաբար կրկնում է Սերժ Սարգսյանին՝ պարո՛ն Նախագահ, և դրանով իսկ ընդգծում Սերժ Սարգսյանի առաջնայնությունն այս հարաբերություններում, ինչն, իհարկե, Սահմանադրությամբ ապահովված է, բայց չի զլանում և ևս մեկ անգամ ընդգծում է միջանձնային շփման մեջ:

Հաջորդ երևույթը և ավելի ցավալին այն էր, որ Արմեն Սարգսյանը, փաստորեն, իր այդքան բազմաթիվ հանդիպումներից հետո ուներ ընդամենը երկու նկատառում: Հայաստանում նա կրթության և քաղաքացիական հասարակության կայացման ոլորտում էր թերություն նկատել: Արմեն Սարգսյանը, համենայնդեպս, իր հանդիպումներից հետո պաշտոնապես այլ խնդիրներ առաջ չբերեց. չի՞ նկատել, դժվար է ասել, բայց այն, որ նրան արգելված է մտնել տարատեսակ ոլորտներ և ազդեցություն ունենալ, ենթադրելի է:

Հաջորդ կարևոր նկատառումը, որ կարելի է մատնանշել, այն է, որ կրկին բարձրացվեցին ներդրումային խնդիրները, և Արմեն Սարգսյանը խոստացավ՝ եթե ընտրվի որպես Հանրապետության նախագահ, և՛ արտաքին հարաբերություններում, և՛ արտաքին տնտեսական հարցերում, և՛ ներդրումների ներգրավման ոլորտում, ազգային միասնության ամրապնդման ոլորտում ու Հայաստան-սփյուռք հարաբերություններում ներդրումներ կբերի: Սա խոսում է միայն այն մասին, որ Սերժ Սարգսյանը փորձում է Կարեն Կարապետյանի դեմքով ապահովել իր հարաբերությունները ՌԴ-ի հետ և այնտեղից ներդրումներ ակնկալել, իսկ Արմեն Սարգսյանի դեպքում՝ Եվրոպայից, ինքն էլ նստած իր աթոռին վայելի ներդրումների պատճառած հաճույքը:

NEWSPRESS.am