Այրված «հրակայուն» ու թանկարժեք աղբամանները, «Սանիթեք»-ի անգործությունն ու քաղաքապետարանի անտարբերությունը (ֆոտո)

Եթե Երևանում աղբահեռացման աշխատանքներն իրականացնող «Սանիթեք» ընկերությունը թվերը չի ուռճացնում, ապա փողոցներում տեղադրված աղբամաններից յուրաքանչյուրն արժե մոտ 240 հազար դրամ։

Քաղաքում այդպիսիք կարելի է տեսնել ամենուր։

Ու չնայած քաղաքապետարանից պնդում են, որ այս աղբամանները որակյալ են և հրակայուն՝ փաստերն այլ բան են վկայում։

Գրեթե ամեն թաղամասում ու նաև հենց կենտրոնում կան այրված աղբամաններ։ NEWSPRESS.am-ի թղթակիցը լուսանկարել է Կենտրոն վարչական շրջանի տարածքում տեղադրված այրված աղբամաններ։

Տեղի բնակիչների խոսքով՝ այս վիճակը շարունակվում է արդեն մի քանի օր, ու ոչ ոք չի փորձում արձագանքել իրենց բողոքներին։ Կիսաայրված աղբամանից աղբը թափվում ու տարածքում առաջացնում է հակասանիտարական վիճակ ու գարշահոտություն։

Աղբամանները նորերով փոխարինելու հարցը «Սանիթեք»-ի գործառույթում է։ Հավանաբար, քաղաքապետարանում, այնուամենայնիվ, գլխի են ընկել, որ գերմանական արտադրության ու «հրակայուն» թանկարժեք աղբամաններն իրենց գրպանով չեն ու նախապես գնդակը «Սանիթեք»-ի դաշտ են ուղարկել։

Նկատենք նաև, որ 2017 թվականին Հայաստանում այրվել է 400 աղբաման, որոնցից հայտնի չէ, թե քանիսն են փոխարինվել նորերով։

Ու թեև «Սանիթեք»-ի աշխատանքների վերահսկողությունը մնում է քաղաքապետարանի գործառույթում, սակայն այս կառույցը վաղուց է ձեռքերը լվացել այդ գործից, իսկ ընկերության նկատմամբ վերահսկողության բացակայությունն էլ բերում է բարձիթողի վիճակի ու քաղաքը լցնում գաղջով։