«Թեյ» օպերացիայի լույս ու ստվերը

Օրերս Արարատի մարզի Մասիս ԲԿ-ում տեղի ունեցած «Թեյ» օպերացիայի մանրամասները հանրության սեփականությունն են։ Առաջին տպավորությունն է, որ իրոք սրտացավ, ԲԿ-ի նորանշանակ  եկավար Նունե Ավանեսյանը, որ մտահղացել, կազմակերպել էր «Թեյ» օպերացիան, նա թեյը մեզի փոխարեն հանձնել էր լաբորատորիա՝ ստուգման, որին լաբորատորիայից մեզին բնորոշ պատասխաններ էին հրամցրել։

Մի կողմ թողնելով այն, որ ԲԿ-ներում անալիզների պատասխանները ոչ միայն ցաքուցրիվ են, երբեմն իրականությունից հեռու պատասխաններ են ստացվում, սակայն այս դեպքում ամեն ինչ այնպես չէ, ամենայն հավանականությամբ, ինչպես ներկայացվում էր։

Նախ պարզվեց, որ «Թեյ» օպերացիա է եղել, հետո պարզվեց, որ երկրի բոլոր ԶԼՄ-ներն այնտեղ են եղել` «Թեյ» օպերացիայից անմիջապես հետո, և ԲԿ լաբորատորիայի աշխատակիցներն անմիջապես դարձան հանրության սեփականությունը։

Նունե Ավանեսյանի նման վարվելակերպը, որը նախևառաջ սպառնում է Մասիս ԲԿ-ի հեղինակությանը, վկայում է, որ նա տարբերակ չի ունեցել ազատվելու լաբորատորիայի հնաբնակներից։

Չուզենալով կասկածի ենթարկել, նաև չունենալով փաստեր՝ նշենք, որ, սովորաբար, նման պաշտոնները հենց այնպես բաժին չեն հասնում. նայած ում՝ ինչպես։
Եվ, սովորաբար, նոր տնօրենն իր հետ բերում է իր թիմին և ահա այս դեպքում լաբորատորիայի հնաբնակները, լինելով պրոֆեսիոնալ կամ ոչ պրոֆեսիոնալ, ի վերջո տարիների փորձառությամբ, զոհ են գնացել տնօրենի աճպարարությանը՝ ԶԼՄ-ների մասնակցությամբ։

Այն, ինչ կատարվել է Մասիս ԲԿ լաբորատորիայում, տեղի է ունենում նաև այլ ԲԿ-ներում, և առողջապահական համակարգի հետ առնչվողները կվկայեն այդ մասին, իսկ Նունե Ավանեսյանի «Թեյ» օպերացիան հուսահատ քայլ է՝ լաբորատորիայի աշխատակիցներից հանրայնորեն ազատվելու համար։

Ընդունենք, որ կրեատիվ մոտեցում է Նունե Ավանեսյանի կողմից։