Հայաստանում կա 100 տարեկանից մեծ 167 ընտրող

«Հայաստանում կրճատվել է բնակչության թիվը, սակայն ընտրողների թիվն աճել է»։

Այս մասին նոյեմբերի 13-ին՝ «Սպասվող հանրաքվե. ընտրացուցակներում առկա տվյալների ուսումնասիրություն» թեմայով քննարկման ժամանակ, ասաց Transparency International ՀԿ հայաստանյան գրասենյակի գործադիր տնօրեն Վարուժան Հոկտանյանը։

Նրան տվյալների համաձայն՝  Հայաստանում կա 100 տարեկանից մեծ 167 ընտրող։

«Հայաստանի ընտրացուցակներում ընդգրկված են մարդիկ, որոնք արտագաղթել են երկրից, բայց նրանց անունները դեռ մնում են։ Մենք ունենք նաեւ 110-120 տարեկան 9 ընտրող»,- հայտարարեց Վարուժան Հոկտանյանը։

Նրա խոսքով՝ կազմակերպությունը գործարկել է էլեկտրոնային մշտադիտարկման մեխանիզմը, որը պետք է օգտագործենք առաջիկա սահմանադրական հանրաքվեի ժամանակ։ «Մենք վերցնում ենք պաշտոնական կայքերի՝ ՀՀ Ոստիկանության ԱՎՎ-ի, ԿԸՀ-ի տվյալները, տեղադրում ենք դրանք մեր կայքում եւ որոշ հաշվարկներ ենք անում։ Մեխանիզմի նպատակն այն է, որ ընտրությունների մասնակիցները, ունենալով այդ տվյալները, կարողանան նախքան քվեարկությունը, քվեարկության ժամանակ եւ դրանից հետո վերահսկել ընթացքը եւ դրանով գիտակցեն հնարավոր ընտրախախտումների մասշտաբները»,- ընդգծեց Հոկտանյանը։