Վարչապետին պարացնում են

Վերջին շրջանում նկատվում է արշավ վարչապետ Կարեն Կարապետյանի դեմ՝ կապված լինի ներդրումների, ռուսական բիզնեսի որոշակի ուժերի, թե գերատեսչությունների կողմից առաջ քաշած նախագծերի հետ: Զգացվում է, որ հող է նախապատրաստվում վարչապետական կառավարման ժամանակ ներկայիս վարչապետին հեղինակազրկելու, ոչ արհեստավարժ ցույց տալու, նաև իր շրջապատի հետ հարաբերությունները փչացնելու միտում:

ԱԺ-ում տարբեր ուժեր աշխատում են այդ ուղղությամբ, բացի այդ ԶԼՄ-ներով է անընդհատ խոսվում վարչապետի թիմի թերությունների մասին, քննադատվում են այնպիսի նախագծեր, որոնք ենթակա չէին քննադատության, նախ և առաջ խոսքը ծխելու դեմ պայքարի մասին է:

Իհարկե, բարձր տույժեր են սահմանված չնախատեսված վայրերում ծխելու համար: Ողջ քաղաքակիրթ աշխարհը պայքարում է ծխելու դեմ, սակայն Հայաստանում, չգիտես ինչու, հակառակն է: Չմոռանանք, որ ծխելու հետևանքով առաջացած հիվանդացության մակարդակը Հայաստանում բավականին բարձր է, տղամարդկանց կյանքի միջին տևողությունը ցածր է կանանց կյանքի միջին տևողությունից, որը ևս հատկապես տղամարդկանց անկանոն կյանքի, տվյալ դեպքում՝ նաև ծխելու հետևանք է:

Բացի այդ, մամուլում շրջանառվում են Շնող ՀԷԿ-ի կառուցման շուրջ զարգացումները: Ինչպես գիտենք, ՀԷԿ-ը կառուցում է «Դեբետ հիդրո» ՍՊԸ-ն և ամերիկյան The Robbins Company-ն համագործակցությամբ: Ծրագրի արժեքը 150-190 մլն դոլար է: Այն կառուցում է «Տաշիր խմբի» նախագահ Սամվել Կարապետյանը, իսկ նա ԱՄՆ-ի հրապարակած «կրեմլյան ցուցակի» մեջ է:

Գնաճի վերաբերյալ կառավարությունը պետք է հաշվետվություն ներկայացնի, ՀՀ-ում այս տարվա գնաճը երևի թե անմիջականորեն կախված չէ վարչապետից, գնաճի համար բավականին գործոններ կան, իհարկե տարբեր դրույքաչափերի փոփոխությունը ևս նպաստեց գների բարձրացմանը, սակայն այդ ամենի համար մեղադրել վարչապետին, երբ ողջ իշխանությունն է թաթախված գնաճի մեջ՝ անհասկանալի է:

Նաև ԲՀԿ-ից և ՀՅԴ-ից է նկատվում հարձակում վարչապետի վրա, ինչը նշանակում է, որ իշխանական ուժերը գործում են միահամուռ՝ վարչապետին հեղինակազրկելու համար և դա արվում է ոչ թե տնտեսության վատ իրավիճակի համար, այլ միմիայն Կարեն Կարապետյանին հեղինակազրկելու և քաղաքական դաշտում նար դիրքերը թուլացնելու համար:

Իսկ վարչապետն ունի՞ թույլ տեղ, իհարկե, բացի այն, որ նա ևս մեղավոր է տնտեսության ներկա իրավիճակի համար, իհարկե, ոչ ամբողջովին, նաև զբաղված է թվանկարչությամբ, ինչպես բոլոր վարչապետերը: Իսկ այդ ամենի համար միակ պատասխանատուն լինելն արդեն քաղաքականություն է:

NEWSPRESS.am