Հայաստանի տնտեսության ցնցոտիները

Հրապարակվել են 2017-ի հունվար-դեկտեմբեր ամիսների տնտեսական ցուցանիշները, ըստ որոնց, պարզ է, որ տնտեսական աճի և գործոնների մասով շարունակվել է տնտեսությունը վերականգնվել՝ ի հաշիվ հանքարդյունաբերության ոլորտի։

Առևտրի և ծառայությունների, նաև վերամշակող արդյունաբերության 15,7% աճ է գրանցվել, 2,2%-ի չափով աճ է գրանցվել նաև շինարարության ոլորտում, նկատվել է մասնավոր տրանսֆերտների ներհոսքի ավելացում։

Թեև նշվում է, որ գործազրկությունը 19%-ից իջել է 16,5%-ի, սակայն 2017-ին զգալի կրճատումներ են եղել պետական համակարգում, շատերը մնացել են առանց աշխատանքի: Թեև դեկտեմբերին միջին աշխատավարձի զգալի աճ է նկատվել, սակայն դրանք ոչ թե աշխատավարձ, այլ հավելավճարներ են եղել՝ Ամանորին ընդառաջ։

Իսկ թե ինչու է գործազրկության ցուցանիշի նվազում ցույց տրված, բացատրվում է աղքատության հնարավոր նվազ մակարդակ ներկայացնելով, պաշտոնապես 30-35 տոկոսի միջակայքում է, սակայն միջազգային հետազոտությունները, որոնք ավելի արժանահավատ են, կոնկրետ նշում են՝ 70 տոկոս։

Այն, որ ՀՀ տնտեսության մեջ շատ բան չի փոխվել, ակնառու է տոկոսադրույքների առումով. դրանք շարունակել են մնալ բարձր։

Աղքատությունն, իհարկե, փորձում են որոշ տվյալներով կոծկել, սակայն փաստ է, որ այն 70 տոկոսի շրջակայքում է. հանքարդյունաբերությունը մեծամասամբ կախված է համաշխարհային շուկայից, գյուղատնտեսությունը ճգնաժամային վիճակում է, առևտուրը նվազել է։ Նման պայմաններում խոսել տնտեսական աճից, ուղղակի անհասկանալի է, իսկ խոսելը նշանակում է՝ զբաղվել պոպուլիզմով։

Ի դեպ, վերջին տարիներին ավելացել է վարկային կազմակերպությունների քանակը, ովքեր բարձր տոկոսադրույքներով վարկեր են տալիս՝ արդեն կրկնակի հետ պահանջում և եթե նման վարկային կազմակերպություններն աճում են և նրանցից օգտվելը պահանջված է, ապա ևս սա մի ցուցիչ է աղքատության ավելացման։

Միայն Հայաստանի նման աղքատ երկրներում են մեծաքանակ վարկեր վերցնում՝ ընկնելով վարկատուների ցանցը, դառնալով վարկային կազմակերպությունների և բանկերի գերին։

Այսինքն՝ բոլոր ցուցիչները վերլուծելով՝ հնարավոր է տեսնել Հայաստանի տնտեսության ողբալի պատկերը, սակայն ողբերգությունը կատակերգության վերածելը հայրենի կառավարության ճկունությունն է ի ցույց դնում, իսկ ձևական ճկունությամբ հնարավո՞ր է տնտեսություն պահել՝ իհարկե, սակայն բնակչության 70 տոկոսը կգտնվի ծայրահեղ աղքատության մեջ, ինչպես և է։

NEWSPRESS.am