Հայաստանում կանայք շուրջ 11 տոկոսով ավելի են տղամարդկանցից

2018 թվականի հունվարի 1-ի դրությամբ Հայաստանի բնակչությունը կազմել է 2 մլն 972 հազար 900 մարդ, ինչը 13 200-ով պակաս է, քան նախորդ տարվա հունվարի 1-ի դրությամբ: 2016 թվականի հունվարի 1-ի համեմատությամբ բնակչությունը նվազել է 25 700-ով: Այս մասին տեղեկացնում է ՀՀ ազգային վիճակագրական ծառայությունը:

Հունվարի 1-ի դրությամբ Հայաստանում բնակվում է 1 մլն 560 հազար 800 կին և 1 մլն 412 հազար 100 տղամարդ. կանայք շուրջ 11 տոկոսով ավելի են տղամարդկանցից:

Հայաստանում կյանքի միջին տևողությունը 75 տարի է․ կանանց համար այդ ցուցանիշը 78,3 տարի է, իսկ տղամարդկանց համար՝ 71,6: Գյուղական համայնքներում կյանքի տևողությունն ավելի կարճ է, քան քաղաքային համայնքներում․ քաղաքային բնակչության համար այդ ցուցանիշը կազմում է 75,6 տարի, գյուղական համայնքներում՝ 74,7 տարի:

Նշենք նաև, որ 2015 թվականին յուրաքանչյուր հազար ծնված նորածնի հաշվով մահացությունը կազմել է 8,8 երեխա, իսկ 2016-ին՝ 8,5 երեխա, իսկ 2017-ին այդ ցուցանիշը նվազել է մինչև 8,1-ի: Ընդ որում՝ տղա երեխաների մոտ մահացության ցուցանիշն ավելի բարձր է. այն 2017-ին կազմել է 8,7, իսկ աղջիկների մոտ՝ 7,6 երեխա: