Ինչո՞ւ չեն ցանկանում բուժվել քաղցկեղից

2017 թվականին Հայաստանում ծխախոտի արտադրությունը, 2016-ի համեմատ, աճել է 19.9%-ով. եթե 2016 թվականին Հայաստանում արտադրվել է 23 մլն 754.4 հազար հատ սիգարետ, ապա 2017-ի հունվար-դեկտեմբերին՝ 28 մլն 476.6 հազար հատ:

Հայաստանում 16 և բարձր տարիքային խմբերում ծխախոտի օգտագործման տարածվածությունը տղամարդկանց շրջանում կազմում է 50%-ից ավելի, կանանց շրջանում՝ 3-4%: Վիճակագրական տվյալների համաձայն՝ Հայաստանում 16 տարեկանից բարձր տղամարդկանց կեսից ավելին ծխող է։

Նշենք, որ ՀՀ առողջապահության նախարարությունը մշակել է «Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագիծը, որով ծխախոտի օգտագործման խիստ սահմանափակումներ են նախատեսվում. մասնավորապես, արգելվելու է ծխախոտի և դրան փոխարինող այլ արտադրատեսակների օգտագործումը, որոշ վայրերում՝ վաճառքը:

Ոչ միայն ծխախոտն է վնասակար, նաև ծխի երկրորդային ազդեցությունը․ այսօր էլ հանրային տրանսպորտում, հանրային վայրերում, տանը համատարած ծխում են, և այն արգելքը, որ հատկապես կիրառվում էր վարորդների նկատմամբ, բավականին մեղմ է, և վարորդների զգալի մասը տրանսպորտի մեջ ծխում է։

Հիշեցնենք, որ ՀՀ առողջապահության նախարարությունը քննարկման է ներկայացրել «Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագիծը, որի նպատակն է կանխարգելել ծխախոտային արտադրատեսակների, ծխախոտի փոխարինիչների օգտագործումը, նպաստել ծխախոտային արտադրատեսակների, ծխախոտի փոխարինիչների օգտագործման դադարեցմանը և բնակչությանը պաշտպանել երկրորդային ծխի ազդեցությունից առաջացող բացասական հետևանքներից:

Արգելվում է ծխախոտային արտադրատեսակներ կամ ծխախոտային արտադրատեսակների նմանակներ կամ ծխախոտի փոխարինիչներ վաճառել կամ որևէ այլ եղանակով իրացնել 18 տարին չլրացած անձանց: Վաճառողն իրավունք ունի պահանջելու անձը հաստատող փաստաթուղթ և դրա չներկայացման դեպքում չվաճառել ծխախոտը: Արգելվում է սիգարետի հատով վաճառքը: Նման արգելքներ նախկինում էլ կային, սակայն չէին գործում։ Սահմանված է նաև հանրային վայրերում ծխախոտի արգելքը՝ տուգանքները զգալիորեն բարձր են։

Հավելենք, որ հանրության մի հատվածը դեմ է ծխախոտի օգտագործման դեպքում հանրային վայրերում տուգանքներ կիրառելուն, ինչը զարմանալի է. ողջ քաղաքակիրթ աշխարհը պայքարում է ծխախոտ ախտի դեմ, իսկ մեր երկրում բողոքում են, թե ինչո՞ւ չեք թողնում՝ ուր ասես ծխենք և ինչքան ասենք ծխենք։

Նշենք, որ թոքի քաղցկեղի, ընդհանրապես քաղցկեղի հիվանդացությունը Հայաստանում շատ բարձր է, որն ուղիղ համեմատական է ծխախոտի օգտագործման, այժմ, երբ փորձում են արգելքներ կիրառել՝ պաշտպանելու հանրության առողջությւոնը հանրությունից, ապա հանրության ծխող հատվածը ընդդիմանում է, քանի որ սովորել են ամենաթողության։

NEWSPRESS.am